ایم کیو ایم کیجانب سے لال مسجد کے خطیب مولوی عبدالعزیز کیخلاف مقدمہ درج

اسلام ٹائمز۔ متحدہ قومی موومنٹ نے اسلام آباد کی لال مسجد کے خطیب مولانا عبدالعزیز کے خلاف مقدمہ درج کرا دیا ہے۔ تفصیلات کے مطابق کراچی کے تھانہ عزیز آباد میں ایم کیو ایم کی رابطہ کمیٹی کے رکن عارف ایڈووکیٹ کی مدعیت میں درج کرائے گئے مقدمے میں اشتعال انگیزی، سائبر کرائم اور مذہبی منافرت پھیلانے سے متعلق دفعات شامل کی گئی ہیں، اس موقع پر ایم کیو ایم کی رابطہ کمیٹی پاکستان کے انچارج قمر منصور، ارکان قومی اسمبلی و سینیٹ اور دیگر رہنما اور کارکن بھی موجود تھے۔ مقدمے کے اندراج کے بعد قمر منصور نے میڈیا سے بات کرتے ہوئے کہا کہ مولانا عبدالعزیز نے اپنے ویڈیو پیغام کے ذریعے مذہبی منافرت اور شرانگیزی پھیلائی، اپنی ویڈیو میں انہوں نے ایم کیو ایم کے قائد الطاف حسین کو جان سے بھی مارنے کی دھمکی دی۔

قمر منصور نے کہا کہ ایم کیو ایم ملک کی تیسری سب سے بڑی سیاسی جماعت اور قانون پر مکمل عمل درآمد کرنے والی پارٹی ہے۔ اس لئے انہوں نے مولانا عبدالعزیز کے خلاف شواہد کی روشنی میں مقدمہ درج کرایا ہے۔ وہ متحدہ قومی موومنٹ کی جانب سے پاک فوج کے سربراہ جنرل راحیل شریف سے مطالبہ کرتے ہیں کہ وہ آپریشن ضرب عضب کا دائرہ ملک بھر میں پھیلائیں، اور ان عناصر کے خلاف بھی کارروائی کریں جو دہشت گردوں کی حمایت کرتے ہیں۔ انہوں نے مزید کہا کہ وقت آگیا ہے ملک کی عوام ان دہشت گردوں کے خلاف پاک فوج اور ملک میں قانون نافذ کرنے والے دیگر اداروں کی حمایت کریں۔ واضح رہے کہ گزشتہ روز سوشل میڈیا پر لال مسجد کے خطیب مولانا عبدالعزیز کا ایک وڈیو پیغام اپ لوڈ کیا گیا تھا، جس میں ایم کیو ایم کے قائد الطاف حسین کے خلاف سخت زبان استعمال کی گئی ہے۔