اسلام آباد:
اسلام ٹائمز۔ پبلک اکاونٹس کمیٹی نے حکومت سے کہا ہے کہ حکومت نیٹو کنٹینرز سے ٹیکس وصول کرے، ان کی آمد و رفت سے ملک بالخصوص فاٹا کی سڑکیں اور پل تباہ ہو رہے ہیں۔ پبلک اکاونٹس کمیٹی کا اجلاس یاسمین رحمان کے زیر صدارت ہوا۔ کمیٹی نے قرار دیا کہ نیٹو کے کنٹینرز پاکستان کی راہداری استعمال کرتے ہیں جس سے سڑکیں اور پل تباہ ہو رہے ہیں لہذا حکومت کو نیٹو سے ٹیکس وصول کرنا چاہئے۔ پی اے سی نے وزیر ہاوسنگ اینڈ ورکس کی جانب سے اپنے دفتر کی تزئین و آرائش پر سوا کروڑ روپے خرچ کرنے سے متعلق رپورٹ بھی طلب کر لی ہے۔ کمیٹی نے فاٹا کے بے تاج بادشاہ، پولیٹکل ایجنٹس صاحبان کے فنڈز کا خصوصی آڈٹ کرنے کی بھی ہدایت کی۔