راولپنڈی کے مدرسے میں طالبہ سے زیادتی کیس میں مہتمم کی ضمانت منظور

اسلام ٹائمز۔ پیر ودھائی کے مدرسے میں طالبہ سے زیادتی کی میڈیکل رپورٹ عدالت میں پیش کر دی گئی، جس میں طالبہ مسمہ م سے زیادتی کی تصدیق ہوگئی۔ سول جج نوشین زرتاج نے تفتیشی ٹیم کی ڈی این اے ٹیسٹ کی درخواست منظور کرتے ہوئے طالبہ کے ڈی این اے ٹیسٹ کا حکم دے دیا۔ علاوہ ازیں مدرسہ کے مہتمم مفتی شاہنواز کی گرفتاری سے بچنے کے لیے مزاحمت کے مقدمہ میں پچاس ہزار روپے پر ضمانت منظور ہوگئی۔ ملزم مفتی شاہنواز کو پولیس نے علاقہ سول جج نوشین زرتاج کی عدالت میں پیش کیا۔ عدالت نے ایک مقدمے میں ضمانت منظور کرلی۔ ڈیوٹی سول جج نے مفتی شاہ نواز کیخلاف زیادتی کیس میں جے آئی ٹی بنانے کا حکم دیتے ہوئے تفتیشی آفیسر سب انسپکٹر کو تفتیش کرنے سے روک دیا۔ عدالت نے کہا کہ یہ ایک سنگین جرم ہے، اس کی تفتیش صرف جے آئی ٹی کرسکتی ہے۔

سول جج نوشین زرتاج نے پولیس کی ملزم کو گرفتار کرنے کی اجازت دینے کی استدعا مسترد کر دی۔ عدالتی فیصلہ سے پولیس میں کھلبلی مچ گئی۔ تفتیشی ٹیم، ایس ایچ او، ڈی ایس پی ایس پی انوسٹی گیشن دفتر پہنچ گئے، جہاں گرفتار ملزم مفتی شاہ نواز کی گرفتاری برقرار رکھنے یا رہا کرنے کا حتمی فیصلہ ہوگا۔ ملزم مفتی شاہ نواز تاحال پولیس حراست میں ہے۔ وکیل صفائی طلعت زیدی نے کہا کہ یہ درست فیصلہ ہے، مفتی شاہ نواز کی گرفتاری برقرار رکھی تو تفتیشی ٹیم کے خلاف توہین عدالت کی درخواست دائر کرینگے۔