بھارت کی ریاستی دہشتگردی عروج پر ہے، کشمیر بھی فلسطین کیطرح جل رہا ہے، سیدہ زہرا نقوی

اسلام ٹائمز۔ مجلس وحدت مسلمین شعبہ خواتین کی مرکزی سیکرٹری جنرل و رکن پنجاب اسمبلی سیدہ زہرا نقوی نے کہا ہے کہ بھارت کی ریاستی دہشتگردی عروج پر ہے، کشمیر بھی فلسطین کی طرح جل رہا ہے، امریکہ اور مغرب کی حکومتیں بھارت کو دنیا کی نمبر ایک جمہوریت قرار دیتے ہیں، یہ مغربی دنیا کی حکومتوں کا دوہرا معیار ہے جو فلسطین کے بعد کشمیر میں نظر آتا ہے۔ انہوں نے کہا کہ کشمیر میں بے گناہ قتل ہورہے ہیں، معصوم بچوں کو درندگی کا نشانہ بنایا جا رہا ہے، اور خواتین کی عصمت دری کی جارہی ہے لیکن انسانی حقوق کی تعریف بھارت جیسے ریاستی دہشتگرد کے لیے علیحدہ بنائی گئی ہے۔ انہوں نے کہا کہ مغربی حکومتوں نے اپنے اسی دوہرے معیار کی بدولت دنیا بھر میں نہ صرف ذلت اور رسوائی حاصل کی ہے بلکہ دنیا کی تمام اقوام اور بالخصوص خود مغربی دنیا کی غیور اور با شعور عوام بھی اپنی ان حکومتوں اور ان کی دوہری پالیسیوں کی وجہ سے نفرت کرتے ہیں۔

 ان کا مزید کہنا تھا خطے میں امن کے قیام کے لیے مسئلہ کشمیر کا حل ہونا لازم ہے کشمیری عوام اپنا حق خودارادیت حاصل کرنے کے لیے ہمیشہ سے قربانیاں دیتے آئے ہیں لیکن اپنے حق سے پیچھے نہیں ہٹے، ان شاء اللہ وہ دن اب دور نہیں جب ظلمت کے اندھیرے چھٹیں گے، ظالم رسوا اور تباہ ہونگے اور مظلومین جہاں کو غلبہ اور طاقت حاصل ہوگی۔