ایران نے مشرق وسطیٰ جیت لیا، امریکی تھنک ٹینک

 

تھنک ٹینک کی رپورٹ میں کہا گیا "درحقیقت ایران نہیں بلکہ امریکہ اور اسرائیل وہ ممالک ہیں، جنہوں نے اپنی طاقت کو نپولین کے انداز میں خطے کی تشکیل نو کے لیے استعمال کرنے کی بھرپور کوشش کی ہے۔ عراق پر تباہ کن امریکی حملہ اور قبضہ اور مصر اسرائیل کی جنگیں (1956ء، 1967ء)، لبنان (1982-2000ء، 2006ء) اور غزہ (2008ء، 2012ء، 2014ء، 2024ء) کے ساتھ ساتھ بڑے پیمانے پر اس کی مسلسل حوصلہ افزائی فلسطینی مغربی کنارے پر قابض ہونے کا مقصد واضح طور پر بڑے پیمانے پر فوجی طاقت کے استعمال کے ذریعے خطے کی جغرافیائی سیاست کو مستقل طور پر تبدیل کرنا تھا۔

لیکن یہ خطہ پہلے ہی کچھ مختلف سمت بڑھ رہا تھا

حال ہی میں ایران کے سپریم لیڈر سید علی خامنہ ای نے سوال کیا: "اسلامی ممالک کے سربراہان قاتل صیہونی حکومت سے کھلے عام اپنے تعلقات منقطع کیوں نہیں کرتے اور اس حکومت کی مدد کرنا بند کیوں نہیں کرتے۔؟" غزہ کے خلاف موجودہ اسرائیلی مہم میں حیران کن ہلاکتوں کے حوالے سے انہوں نے عرب ممالک (بحرین، مراکش، سوڈان، اور یو اے ای) پر توجہ مرکوز کی جنہوں نے ابراہم معاہدے کا حصہ بن کر اسرائیل کو باضابطہ طور پر تسلیم کیا اور اس کے ساتھ تعلقات استوار کئے۔

 

تاہم بائیڈن انتظامیہ کے اہلکاروں کی طرف سے یہ بہرے پن کی واضح علامت تھی، کیونکہ وہ غزہ کے بحران کو ابراہم معاہدوں میں توسیع، سعودی عرب کو بھی اس میں شامل کرنے، فلسطینیوں کو مزید دبانے اور ایران کیخلاف ایک مشترکہ اسرائیل عرب اتحاد بنانے کیلئے استعمال کرنے کی کوشش کر رہے ہیں لیکن یہ علاقہ پہلے ہی کچھ مختلف سمت میں بڑھ رہا تھا۔ گذشتہ مارچ میں ایران اور سعودی عرب نے سفارتی تعلقات بحال کرکے اور اپنے درمیان تجارت کو وسعت دینے کے لیے کام کرتے ہوئے نئے تعلقات کا آغاز کیا۔ اسرائیل اور غزہ میں "ڈراؤنا خواب" تیار ہوتے ہی یہ تعلق بہتر ہوتا چلا گیا۔

 

درحقیقت ایرانی صدر ابراہیم رئیسی نے پہلی بار سعودی دارالحکومت ریاض کا دورہ کیا اور غزہ میں تنازع شروع ہونے کے بعد سے ایرانی وزیر خارجہ اپنے سعودی ہم منصب سے دو مرتبہ ملاقات کرچکے ہیں۔ سعودی عرب کے حقیقی حکمران شہزادہ محمد بن سلمان اور ایران کے سید علی خامنہ ای نے واشنگٹن کو نظرانداز کرنے اور اپنے تعلقات کو مزید مضبوط کرنے کے لیے بیجنگ کے "اچھے" دفاتر کا رخ کیا ہے۔ اگرچہ ایران سعودی عرب سے زیادہ اسرائیل کا دشمن ہے، لیکن ان کی قیادتیں اس بات پر متفق ہیں کہ فلسطینیوں کو پسماندہ کرنے کے دن ختم ہوچکے ہیں۔ 

 

فروری کے اوائل میں جاری ہونے والے ایک غیر مبہم بیان میں سعودیہ نے امریکی انتظامیہ کو اپنے مضبوط موقف سے آگاہ کیا ہے کہ اسرائیل کے ساتھ اس وقت تک کوئی سفارتی تعلقات نہیں ہوں گے، جب تک کہ 1967ء کی مشرقی سرحدوں پر ایک آزاد فلسطینی ریاست کو تسلیم نہیں کیا جاتا۔ یروشلم اس کا دارالحکومت ہے اور یہ کہ غزہ کی پٹی پر اسرائیلی جارحیت رک جائے اور تمام اسرائیلی قابض افواج غزہ کی پٹی سے نکل جائیں۔ قابل ذکر بات یہ ہے کہ سعودیوں نے یہاں تک کہ فلسطینیوں کی حمایت میں یمن کے حوثیوں کی طرف سے بحیرہ احمر کی جہاز رانی پر حملوں کو روکنے کے لیے بنائی گئی امریکی قیادت والی بحری ٹاسک فورس میں شامل ہونے سے انکار کر دیا۔

 

جنوری کے آخر میں، صدر رئیسی نے ترکی کے صدر رجب طیب ایردوان کے ساتھ تجارت اور جغرافیائی سیاست پر بات چیت کے لیے انقرہ کا سفر کرکے علاقائی سفارت کاروں کو بھی حیران کر دیا، جو خطے میں ان کے ملک کے بدلتے ہوئے کردار کی ایک اور علامت ہے۔ دورے کے اختتام پر تجارت اور تعاون کو بڑھانے کے لیے مختلف معاہدوں پر دستخط کرتے ہوئے انہوں(رئیسی) نے اعلان کیا : "ہم فلسطینی کاز، مزاحمت کے محور کی حمایت کرنے اور فلسطینی عوام کو ان کے جائز حقوق دینے پر متفق ہیں۔" یہ کوئی چھوٹی بات نہیں ہے۔ 

 

یاد رہے کہ ترکی نیٹو کا رکن ہے اور اسے امریکہ کا قریبی اتحادی سمجھا جاتا ہے۔ غزہ پر اسرائیلی وزیراعظم بنجمن نیتن یاہو کی جنگ کو ہٹلر کی طرز کی نسل کشی قرار دیتے ہوئے اردوغان کا اچانک ایران کے ساتھ ہم آہنگ ہونا واشنگٹن کے منہ پر ایک طمانچہ تھا۔ ایک بات واضح تھی: ایران کو علاقائی اثر و رسوخ سے باہر کرنے کے لیے واشنگٹن کی طویل جدوجہد واضح طور پر ناکام ہوگئی تھی۔

 

گذشتہ نومبر میں منعقدہ گلف انٹرنیشنل فورم (GIF) میں عمان کے ایک ممتاز ماہر تعلیم عبداللہ بابود نے کہا "ایران اور ترکی کی جانب سے اسرائیل کی شدید مذمت کی گئی، جس نے کچھ عرب ممالک کو شرمندہ کیا، جو اس طرح کی زبان استعمال نہیں کرتے۔ میرے لیے پریشانی کی بات یہ ہے کہ یہ تنازعہ عرب عوام میں ترکی اور ایران کو بااختیار بنانے کی طرف لے جاتا ہے۔" GIF کی ایگزیکٹو ڈائریکٹر دانیہ ظفر نے اس بات سے اتفاق کیا اور کہا کہ (غزہ کے حوالے سے) غم اور غصہ انتہا سطح پر پہنچ گیا ہے، غزہ کی ہر تصویر کے ساتھ ایران پورے خطے میں زیادہ اثر و رسوخ حاصل کر رہا ہے۔" مختصراً اور بہت کم قیمت پر، ایران غیر متوقع طور پر علاقائی رائے عامہ کی جنگ جیت رہا ہے اور عرب دنیا میں اس کی حیثیت غیر معمولی طور پر بلند ہوئی ہے۔

ایک ہی وقت میں امریکہ کی ساکھ کو واشنگٹن کی طرف سے (اسرائیل کی) مکمل حمایت سے داغدار کیا گیا ہے، جسے خطے کے زیادہ تر لوگ ہزاروں بچوں اور دیگر معصوم شہریوں کے بے رحمانہ قتل عام کے طور پر دیکھتے ہیں۔ واشنگٹن ڈی سی میں عرب سینٹر اور قطر کے دوحہ میں عرب سینٹر فار ریسرچ اینڈ پالیسی اسٹڈیز کی جانب سے مشترکہ طور پر 16 ممالک میں عربوں کے بارے میں کیے گئے، ایک حالیہ رائے عامہ کے سروے میں پایا گیا کہ ان میں سے 94 فیصد لوگوں نے اسرائیل کی جنگ کے بارے میں امریکی موقف کو مسترد کرتے ہوئے بری نظر سے دیکھا، اس کے برعکس، حیرت انگیز طور پر ان میں سے 48 فیصد نے ایرانی موقف کو درست قرار دیا۔

 

ایران میں علماء کی مقبولیت میں ڈرامائی طور پر اضافہ ہوا ہے، حتیٰ کہ عرب اور مسلم ممالک میں بھی جنہوں نے پہلے ان کی زیادہ حمایت نہیں کی تھی۔ انہوں نے عراقی شیعوں کے ساتھ اپنے تعلقات کو مضبوط کیا ہے اور ہوسکتا ہے کہ وہ عراق اور شام میں امریکی فوجی مشن کو ختم کرنے کے اپنے مقصد کو حاصل کرنے کے راستے پر ہوں۔ انہوں نے سعودی عرب اور دیگر خلیجی عرب تیل ریاستوں کے ساتھ تعلقات کو بہتر کرتے ہوئے ترکی کے ساتھ بھی قریبی تعلقات قائم کئے۔ ایسا کرتے ہوئے انہوں نے بائیڈن انتظامیہ کے ایران کو الگ تھلگ کرنے کے مقصد کو واضح طور پر کمزور کر دیا ہے۔

 

مزید برآں، ان حالیہ مہینوں میں اسرائیل کی حمایت اور پشت پناہی اور ہتھیار فراہم کرکے واشنگٹن نے انسانی حقوق کی بات کرنے والے ان نکات کی دھجیاں اڑائی ہیں، جنہیں امریکہ نے طویل عرصے سے ایران کے خلاف استعمال کیا ہے۔ اس عمل میں، جو بائیڈن نے عالمی سطح پر بین الاقوامی انسانی قانون اور جمہوری اصولوں کو کمزور کرنے کے لیے کسی بھی جدید صدر سے زیادہ کام کیا ہے۔ چونکہ 94 فیصد عرب رائے دہندگان خطے میں امریکی پالیسی کو بری نظر سے دیکھتے ہیں، ایک چیز واضح ہے، فی الوقت کم از کم، ایران نے مشرق وسطیٰ جیت لیا ہے۔"

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مآخذ