اسلام ٹائمز۔ قومی اسمبلی سے خطاب میں وزیراعظم راجہ پرویز اشرف نے کہا کہ ہزارہ برادری کو یقین دلاتا ہوں کہ ہم ہر حد تک جائیں گے، ہزارہ برادری کا ہر مطالبہ پورا کریں گے۔ ہر وہ انسان جو انسانیت پر یقین رکھتا ہے وہ اس واقعے پر رنجیدہ ہے۔ ملک دہشت گردی کا شکار ہے، ان کا کہنا ہے کہ جنہوں نے دہشت گردی کی ان دہشت گردوں کو کیفر کردار تک پہنچائینگے اور ان کو جہنم واصل کیا جائے گا، بلوچستان کی صورت حال پر ہم نے سنجیدہ اقدامات کئے اور صوبے میں گورنر راج نافذ کیا، حکومت نے یہ نہیں دیکھا کہ بلوچستان میں ہماری حکومت ہے بلکہ ہر ممکن اقدامات کیے، ایف سی کی نفری میں بھی اضافہ کیا۔ گورنر بلوچستان سے کہا ہے کہ کسی کی بھی غفلت ہو تحقیقات کرکے بتائیں، پوری قوم کو یقین دلانا چاہتا ہوں کہ ہم ہر ممکن حد تک جائینگے، غفلت برتنے والوں کا تعلق خواہ کسی بھی ایجنسی سے ہو، اس کیخلاف کارروائی کریں گے۔ وفاق نے ہر ممکن اقدامات کئے لیکن بدقسمتی سے ہزارہ کالونی کا واقعہ رونما ہوا۔ صورتحال سے نکلنے کیلئے مشترکہ سوچ اپنانے کی ضرورت ہے، ہمیں ایک دوسرے کا ہاتھ تھامنا ہے، حکومت اور اپوزیشن کو دہشتگردوں کیخلاف تفریق ختم کرنا ہوگی، اگر ہم آپس میں لڑتے رہے تو مسئلہ حل نہیں ہوگا۔