شمالی وزیرستان، بارودی سرنگ کے دھماکے میں خاتون زخمی

اسلام ٹائمز۔ شمالی وزیرستان ایجنسی کی تحصیل دتہ خیل میں بارودی سرنگ کے دھماکہ میں ایک خاتون زخمی ہوگئی۔ سکیورٹی ذرائع کے مطابق تحصیل دتہ خیل کے علاقہ چار خیل لنڈ سید آباد میں مسماۃ انور زادہ زوجہ اسماعیل گھر کے قریب واقع کھیتوں میں گندم کی کٹائی میں مصروف تھی کہ اس دوران کھیتوں کے قریب پہلے سے نصب بارودی مواد زور دار دھماکہ سے پھٹ گیا جس کے نتیجہ میں انور زادہ زخمی ہو گئی۔ ذرائع نے بتایا کہ مجروحہ کو طبی امداد کے لئے سول ہسپتال میرانشاہ منتقل کر دیا گیا ہے، جہاں اس کی حالت خطرے سے باہر بتائی جاتی ہے دوسری جانب سکیورٹی فورسز نے علاقے سے شواہد اکٹھے کرکے تفتیش شروع کردی ہے۔