غزہ جنگ کے 200 دنوں میں مظلوم فلسطینی شہداء کی تعداد 34183 ہوگئی

اسلام ٹائمز۔ غزہ کی وزارت صحت نے فلسطینی شہداء کی تعداد 34 ہزار 183 اور زخمیوں کی تعداد 77 ہزار 143 تک پہنچنے کا اعلان کیا ہے۔ اسلامی جمہوریہ ایران کے خبر رساں ادارے فارس نیوز کے مطابق غزہ کی وزارت صحت کے ترجمان ڈاکٹر اشرف القدرہ نے آج اعلان کیا ہے کہ شہداء کی تعداد بڑھ کر 34,183 اور زخمیوں کی تعداد 77,143 ہوگئی ہے۔ ان کے مطابق قابض فوج نے گذشتہ 24 گھنٹوں کے دوران غزہ میں 3 نئے جرائم کا ارتکاب کیا، جس کے نتیجے میں 32 افراد شہید اور 59 زخمی ہوئے۔

اس دوران غزہ کے مختلف علاقوں پر آج صبح سے بمباری اور گولہ باری کا سلسلہ جاری رہا۔ صبح سویرے اسرائیلی جنگی طیاروں نے غزہ شہر کے وسط میں "الثلاشینی" کے علاقے پر شدید بمباری کی اور شمالی غزہ کو بھی ڈرون حملوں کا نشانہ بنایا گیا۔ آج صبح اسرائیلی فوج کی کشتیوں نے غزہ شہر کے جنوب میں "الزیتون" محلے پر گولہ باری کی۔ اس سے ایک گھنٹہ قبل قابض فوج کے توپ خانے نے شمالی غزہ کے مشرقی علاقوں کو بڑے پیمانے پر نشانہ بنایا اور زور دار دھماکوں کی آواز سے پورا علاقہ گونج اٹھا۔

خان یونس شہر کے مشرقی علاقوں کو بھی بھاری توپ خانے کے حملوں کا نشانہ بنایا گیا۔ دوسری جانب یورپی-میڈیٹیرینین ہیومن رائٹس واچ نے ایک بیان میں غزہ میں معدے کی بیماریوں کے پھیلاؤ کے بارے میں خبردار کیا ہے اور کہا ہے کہ صحت اور طبی صورتحال کی نازک صورتحال اور "اسرائیلی قابض کے ہاتھوں بڑے پیمانے پر نسل کشی" کے تسلسل کے باعث یہ خطرہ لاحق ہے اور مختلف بیماریوں کے پھیلاؤ خصوصاً پیٹ کی بیماریوں میں اضافہ ہوتا جا رہا ہے۔