لودھراں، پی ٹی آئی کا جلسہ

اسلام ٹائمز۔ الیکشن کمیشن آف پاکستان کے احکامات کے باجود پاکستان تحریک انصاف کا لودھراں کے علاقے پپلی موڑ پر شاندار جلسہ، کپتان سمیت پی ٹی آئی کی مرکزی قیادت موجود، عمران خان کی ایک بار پھر حکومت پر سخت تنقید، جلسے سے خطاب میں تحریک انصاف کے چیئرمین عمران خان نے کہا کہ شہبازشریف وہ فرعون ہے جس کا وقت قریب آگیا ہے، نوازشریف کو نکال دیا اب شہباز شریف کی باری ہے، عمران خان نے کہا کہ ہم نے جہانگیر ترین کی نااہلی کا فیصلہ تسلیم کیا لیکن جہانگیر نے کبھی ٹیکس چوری، منی لانڈرنگ یا کرپشن نہیں کی، جہانگیر ترین سب سے زیادہ ٹیکس دینے والے رکن پارلیمنٹ تھے یہ شریفوں یا زرداریوں کی طرح نہیں جو کسانوں کو گنے کی پوری قیمت نہ دے۔ تحریک انصاف کے سربراہ نے کہا کہ سپریم کورٹ سمیت اداروں کا احترام کرتے ہیں، ہم نے فیصلوں کو تسلیم کیا، نوازشریف کی طرح یہ نہیں کہا کہ ہمیں کیوں نکالا۔ نوازشریف 300 ارب ملک سے باہر لے گئے جس کا حساب دینے کے بجائے الٹا کہتے ہیں کہ نیب نے ہمارے سوالوں کا جواب نہیں دیا، سپریم کورٹ نے نوازشریف کو مافیا کا گارڈ فادر قرار دیا.

عمران خان نے کہا کہ پنجاب پولیس تباہ ہوگئی، پنجاب پولیس کے گرفتار انسپکٹر عابد باکسر نے بتایا کہ وہ شہبازشریف کے کہنے پر لوگوں کا قتل کرتا تھا، عابد باکسر نے بیان دیا کہ اس نے شہبازشریف کے کہنے پر دو لوگوں کو قتل کیا، اسی طرح پنجاب پولیس نے ایک سال میں 137 ماورائے عدالت قتل کیے، جب کہ سانحہ ماڈل ٹان علیحدہ ہے، شہباز شریف وہ فرعون ہے جس کا وقت قریب آگیا ہے، نوازشریف کو نکال دیا اب شہبازشریف کی باری ہے، چیئرمین تحریک انصاف نے کہا کہ پاکستان غریب ملک نہیں اور نہ یہاں وسائل کی کمی ہے، پاکستانی قوم باصلاحیت اور ہنرمند ہے لیکن ملک پر مافیا کی حکمرانی ہے جو اربوں روپے کے قرضے لے کر قوم کو مفلوج کر رہی ہے۔ جلسہ عام سے عوامی مسلم لیگ کے سربراہ شیخ رشید احمد، پاکستان تحریک انصاف کے وائس چیئرمین مخدوم شاہ محمود قریشی، سابق سیکرٹری جنرل جہانگیر ترین، اُمیدوار رکن قومی اسمبلی علی خان ترین، ممبر قومی اسمبلی مراد سعید، فردوس عاشق اعوان، ملک عامر ڈوگر، علیم خان اور دیگر نے خطاب کیا۔