لینڈ ریفارمز بل سٹیک ہولڈرز کی مشاورت سے ہی پاس ہوگا، فتح اللہ خان

اسلام ٹائمز۔ وزیر اطلاعات گلگت بلتستان فتح اللہ خان نے کہا ہے کہ اپوزیشن لیڈر امجد اینڈ کمپنی کی مشترکہ پریس کانفرنس حقائق کے برعکس اور عوام کو گمراہ کرنے کے علاوہ کچھ نہیں۔ امجد اینڈ کمپنی کے پاس موضوع نہ ہو تو اپنی جعلی اپوزیشن کو زندہ رکھنے کے لئے اوٹ پٹانگ گفتگو، میڈیا ٹاکس روز اول سے کر رہے ہیں۔ ایک بیان میں وزیر اطلاعات نے کہا کہ لینڈ ریفارمز کے حوالے سے صوبائی حکومت سنجیدہ اقدامات کر رہی ہے۔ صوبائی سطح پر اسمبلی ممبران، سول سوسائٹی و دیگر سٹیک ہولڈرز کی باہمی مشاورت سے ہی لینڈ ریفارمز بل اسمبلی سے پاس کروائنگے۔ امجد اپنے ہی چند نااہلوں اور شکست خوردہ عناصر کے ساتھ مشترکہ پریس کانفرنس میں انہوں نے یہ مطالبہ کیا کہ ہم نے لینڈ ریفارمز کے حوالے سے جو بل اسمبلی میں پیش کیا ہے وہی بل اسمبلی سے پاس ہو ورنہ ہم مزاحمت کرینگے تو امجد صاحب سن لو حکومت ہماری ہو اور فرمائشیں آپکی پوری ہوں یہ کیسے ہو سکتا ہے۔