پانامہ لیکس کی تحقیقات پارلیمانی فورم سے کرائی جائیں، بلاول بھٹو

اسلام ٹائمز۔ پیپلزپارٹی کے چیئرمین بلاول بھٹو زراری نے کہا ہے کہ پانامہ لیکس کے معاملے پر تمام سیاسی جماعتوں سے بات چیت کے بعد ٹی او آر کا تعین پارلیمنٹ کو کرنا چاہیئے۔ بلاول بھٹو زراری سے پیپلزپارٹی کی پارلیمانی کمیٹی کے ارکان نے اسلام آباد میں ملاقات کی اور سیاسی جماعتوں سے پانامہ لیکس پر ہونے والی مشاورت پر بریفنگ دی گئی۔ اس موقع پر بلاول بھٹو زرداری کا کہنا تھا کہ پانامہ لیکس کی تحقیقات پارلیمانی فورم سے کرائی جائیں، وزیراعظم کے نامزد کمیشن اور ٹی او آر کے مطابق تحقیقات کی ساکھ نہیں ہوگی، بلاول بھٹو کا کہنا تھا کہ وزیراعظم اور ان کے اہل خانہ کے نام پانامہ پیپرز میں شامل ہیں۔ اس لئے تمام سیاسی جماعتوں سے بات چیت کے بعد کمیشن اور ٹی او آر کا تعین پارلیمنٹ کو کرنا چاہیے۔