اسلام ٹائمز۔ شہر قائد میں اورنگی ٹاؤن کے فالودہ بیچنے والے عبدالقادر کے بینک اکاؤنٹ میں 2 ارب 25 کروڑ کی رقم ٹرانسفر کرانے والے کا پتہ چل گیا ہے۔ میڈیا رپورٹس کے مطابق کراچی کے عبدالقادر کے اکاؤنٹ میں اربوں روپے کی موجودگی کی خبر کے بعد رقم ٹرانسفر کرنے والے بزنس گروپ کا پتہ لگا لیا ہے۔ پولیس کے مطابق اورنگی ٹاؤن کے سیکٹر 8 ایل کے عبدالقادر کے اکاؤنٹ میں خطیر رقم ایک بزنس گروپ نے رکھی تھی، جسے تفتیش کیلئے طلب کر لیا گیا ہے۔ تفتیشی حکام کے مطابق عبدالقادر کے بینک اکاؤنٹ میں 2 ارب 25 کروڑ کی رقم 2014ء اور 2015ء میں منتقل کی گئی۔ حکام کے مطابق ایسے اکاؤنٹس مختلف بزنس گروپس ملک کے مختلف حصوں میں کھلواتے ہیں، اس نوعیت کے اکاؤنٹ کو "ٹریڈ اکاؤنٹس" کہا جاتا ہے، عبدالقادر کے نام پر بھی اس طرز کا اکاؤنٹ کھولا گیا۔ حکام کے مطابق جو بھی بزنس گروپ اس نوعیت کا یا جس شخص کے نام پر بھی اکاؤنٹ کھلتا ہے، اسے پیسے بھی دیئے جاتے ہیں۔