سیاحت کا فروغ، کراچی سے شروع ہونیوالی کار ریلی پشاور پہنچ گئی، غیرملکی سیاحوں کی بھی شرکت

اسلام ٹائمز۔ صوبائی وزیر سیاحت و ثقافت محمد عاطف خان نے کہا ہے کہ صوبے میں غیر ملکی سیاحوں کی آمد اس بات کی دلیل ہے کہ یہاں امن بحال ہوچکا اور لوگ بغیر کسی خوف کے مثبت سرگرمیوں میں حصہ لے رہیں گے۔ ان خیالات کا اظہار انہوں نے کراچی سے پشاور پہنچنے والی کلاسک کار ریلی کی نمائش کے موقع پر میڈیا سے گفتگو کرتے ہوئے کیا۔ سینئر صوبائی وزیر کا کہنا تھا کہ ملکی سیاحت کو فروغ دینے کیلئے وزیراعظم عمران خان خود بھی سرگرم ہیں، اسی باعث انہوں نے اس اہم مقصد کیلئے وفاقی سطح پر ٹوررازم (سیاحتی) بورڈ کے قیام کا اعلان بھی کیا۔

ان کا کہنا تھا کہ وفاقی ٹوررازم بورڈ غیر ملکی سیاحوں کو ویزے کی فراہمی سمیت تمام مسائل حل کرے گا اور سیاحوں کی حفاظت کیلئے بہتر انتظامات بھی کئے جا رہے ہیں جبکہ غیرملکیوں کیلئے ویزہ حصول کا طریقہ کار مزید آسان بنایا جائے گا۔

محمد عاطف خان کا کہنا تھا کہ خیبر پختونخوا صوبے میں غیر ملکی سیاحوں کی آمد شروع ہوچکی جو اس بات کی واضح دلیل ہے کہ یہاں کا امن اب پورے طریقے سے بحال ہوچکا اور غیر ملکی سیاح بغیر کسی خوف کے مثبت سرگرمیوں میں حصہ بھی لے رہے ہیں۔

وزیرسیاحت و ثقافت کا کہنا تھا کہ صوبے میں نئے سیاحتی مقامات کا تعین کرنا حکومت کی ترجیحات میں شامل ہے، ہم نے پانچ سالوں میں 20 نئے مقامات دریافت کرنے کا ہدف مقرر کیا، جن میں سے 10 کی نشاندہی ہوچکی جہاں بہت جلد انفراسٹچر سمیت تمام تر سہولیات فراہم کردی جائیں گی تاکہ سیاحوں کی آمد ورفت کا سلسلہ شروع ہوسکے۔

قبل ازیں ٹوررازم کارپوریشن خیبر پختونخوا کے تعاون سے پشاور میں 9ویں کلاس کار ریلی کی نمائش کا انعقاد کیا گیا تھا جس میں پاکستان بھر کی 30 سے زائد 1939 سے پرانے ماڈل کی گاڑیاں شامل ہوئیں۔ کراچی سے شروع ہونے والی ریلی کو بابِ خیبر پر اختتام پذیر ہونا ہے، اس ایونٹ میں غیر ملکی سیاح اور اُن کے اہل خانہ نے شرکت کی۔

غیر ملکی سیاحوں نے ریلی کے انعقاد کو شاندار اقدام قرار دیتے ہوئے کہا کہ ’پاکستان ایک پُرامن ملک ہے اور یہاں کے شہری بہت زیادہ مہمان نواز ہیں، ہم پشاور سمیت کسی بھی علاقے میں باآسانی سفر کرتے ہیں۔