جمہوریت میرٹ کا نام ہے، جو احتساب اور جواب دہی کے بغیر آگے نہیں بڑھ سکتی، عمران خان

وزیراعظم نے کہا کہ عثمان بزدار اپنے عہدے کو اپنی ذات کے لیے استعمال نہیں کریںگے، وہ اپنی فیکٹریاں اور شوگر مل نہیں بنائیں گے اور بینکوں سے قرض نہیں لیں گے۔ ان کا کہنا تھا کہ عثمان بزدار اپنے بیٹوں کو ارب پتی نہیں بنائیں گے، نہ ہی اپنے رشتہ داروں کو نوازیں گے۔ وزیراعظم نے شعبہ لائیواسٹاک میں پاکستان 7ویں نمبر پر ہے، شعبہ لائیواسٹاک اور زراعت میں جدیدٹیکنالوجی متعارف نہیں کرائی گئی۔ ان کا کہنا تھا کہ بین الاقوامی زرعی کمپنی کارگل کا کہنا ہے کہ ہم یہاں سے 2012ء میں واپس چلے گئے تھے، کیونکہ یہاں بہت زیادہ کرپشن تھی۔ انہوں نے کہا کہ پاکستان میں وسائل کی کمی نہیں، وہ ملک جسے دودھ دنیا کو بیچنا چاہیے ہم یہاں پاکستان میں سوکھا دودھ درآمد کرتے ہیں۔ وزیراعظم نے کہا کہ ہمیں پتہ نہیں کون سی تکنیک استعمال کرنی چاہیے، امریکا میں ایک گائے سے 26 لیٹر دودھ حاصل کیا جاتا ہے، لیکن پاکستان میں ایک گائے سے 6 لیٹر دودھ ملتا ہے۔

نمل یونیورسٹی کی کانووکیشن تقریب سے خطاب کرتے ہوئے وزیراعظم عمران خان نے کہا کہ ملک سے اربوں روپے چوری کیے گئے، بڑی بڑی کمپنیاں کرپشن کے باعث ملک چھوڑ کر چلی گئی تھیں لیکن اب ہمارا ملک اٹھ رہا ہے اور سرمایہ کار آرہے ہیں۔ وزیراعظم کا کہنا تھا کہ چین میں 400 وزیروں کو جیلوں میں ڈالا گیا، حکمرانوں سے ان کے مال کے بارے میں پوچھنے سے جمہوریت خطرے میں نہیں پڑتی، جب ان سے جواب مانگو کہ پیسے کہاں سے بنائے تو یہ شور مچاتے ہیں۔ وزیراعظم عمران خان نے کہا کہ پاکستان کا جو بھی لیڈر ہوگا وہ عوام کے سامنے جوابدہ ہوگا، جمہوریت میں میرٹ ہوتی ہے بادشاہت میں نہیں۔ انہوں نے کہا کہ ہم اس لیے پیچھے رہ گئے کیونکہ ہم محنت نہیں کرتے، کامیابی انہیں ملتی جو محنت اور تحقیق کرتے ہیں۔ عمران خان نے کہا کہ ہم نمل میں ایگرو بزنس ماڈرن ایگری کلچر ٹیکنالوجی کا آغاز کرررہے ہیں اور ملک میں جدید ایگریکلچر ٹیکنالوجی بانی بنیں گے۔

ان کا کہنا تھا کہ اب تو یہ بھی علم ہے کہ ایک کھیت میں کتنا پانی اور کتنی کھاد چاہیے۔ ان کا کہنا تھا کہ اتنے دور دراز علاقے میں یونیورسٹی قائم کرنا مشکل ہوتا ہے، کامیاب طلبا اور ان کے والدین کو مبارکباد پیش کرتا ہوں۔ انہوں نے کہا کہ 2 قسم کے دنیاوی نظریات ہیں، ایک نظریہ یہ ہے کہ اپنے لیے بے حساب پیسہ کماتے جائیں، اس نظرے کی وجہ سے 62 افراد ایسے ہین، جن کے پاس دنیا کے ساڑھے 3 ارب افراد جتنی دولت ہیں اور انہیں اپنا پیسہ ختم کرنے میں 4 سو برس لگیں گے۔ عمران خان نے کہا کہ دوسرا نظریہ یہ ہے کہ آپ پہلے اپنی ضروریات پوری کریں اور سوچیں کہ میں دوسرے انسانوں کے لیے کیا کرسکتا ہوں۔ وزیراعظم نے طلبہ کو پیغام دیا کہ  پیسہ بنانا زندگی کا مقصد نہ رکھیں، جن لوگوں نے پیسے کو زندگی کا مقصد بنایا ان کو آپ خوش نہیں دیکھیں گے، دوسرے انسانوں کی بہتری کے لیے کام کرنا اللہ کو پسند ہے، اپنی غلطیوں کاجائزہ لیں، محنت کریں اور اوپر آئیں۔

عمران خان نے طلبا کو پیغام دیتے ہوئے کہا کہ کامیاب انسان نشیب و فراز سے نہیں ڈرتا، چیلنجز کو قبول کریں۔ ان کا کہنا تھا کہ زندگی میں چیلنج کا ہونا ضروری ہے ورنہ انسان بوڑھا جاتا ہے۔ ان کا کہنا تھا کہ نمل یونیورسٹی ایک پلیٹ فارم ہے، لیکن پیسے کو زندگی کا مقصد نہیں بنائیں۔ انہوں نے مزید کہا کہ پیسے بنانے والوں کو میں نے کبھی خوش نہیں دیکھا کیونکہ آپ سے امیر کوئی دوسرا ہوسکتا ہے۔ وزیراعظم نے کہا کہ علامہ اقبال جانتے تھے کہ مغرب کی طاقت کیا ہے اور ہماری طاقت کیا ہے، اپنی ثقافت کو نہیں بھولیں۔ اس سے قبل وزیراعظم عمران خان اپنے آبائی شہر میانوالی پہنچے، جہاں وزیراعلیٰ پنجاب عثمان بزدار اور نمل کالج کی انتظامیہ نے وزیراعظم کا پرتپاک استقبال کیا۔ وزیراعظم چھٹی کا روز اپنے آبائی شہر میں گزاریں گے اور پارٹی رہنماؤں سے ملاقات بھی کریں گے۔ عمران خان نمل کالج میں آرٹ اور بزنس بلاک کا افتتاح بھی کریں گے۔