امریکہ کی دوستی اور دشمنی دونوں خطرناک ہے، صاحبزادہ حامد رضا

اسلام ٹائمز۔ سنی اتحاد کونسل پاکستان کے چیئرمین صاحبزادہ حامد رضا نے کہا ہے کہ خطے میں امن کیلئے مسئلہ کشمیر کا پائیدار حل ناگزیر ہے، حکومت احتجاجی تحریک سے بچنا چاہتی ہے تو عوام کے مسائل حل کرے، ملک کو مفاداتی نہیں نظریاتی سیاست کی ضرورت ہے، الزام اور انتقام کی سیاست ہمیشہ کیلئے دفن کرنا ہو گی۔ انہوں نے کہا کہ سیاسی محاذ آرائی اور انتشار و فساد ملکی مفاد میں نہیں، حکومتی نااہلی و ناکامی کھل کر سامنے آ چکی ہے، پی ٹی آئی حکومت کی پہلے سال کی کارکردگی مایوس کن ہے، امریکہ کی دوستی اور دشمنی دونوں خطرناک ہے۔ امریکہ نے ہمیشہ پاکستان کیساتھ گاجر اور ڈنڈے کی پالیسی اختیار کئے رکھی ہے، امریکہ سے خیر کی توقع رکھنا حماقت ہے، امریکہ نواز خارجہ پالیسی ختم کرنے کا وقت آ گیا ہے، حکومت قادیانیوں کی سہولت کار بنی تو ایک دن میں ختم ہو جائے گی، قادیانیوں کو مسلمان کا سٹیٹس نہیں دیا جا سکتا۔ اقوام متحدہ اور امریکہ پاکستان کے مذہبی معاملات میں مداخلت سے باز رہیں۔ ان خیالات کا اظہار انھوں نے جامعہ علمیہ میں علماء کے اجلاس سے خطاب کرتے ہوئے کیا۔ صاحبزادہ حامد رضا نے مزید کہا کہ معاشی بحران کی بڑی وجہ بیڈ گورننس ہے۔ پی ٹی آئی کی حکومت نے عوام کو سخت مایوس کیا ہے۔ اپوزیشن کی احتجاجی تحریک میں شمولیت کیلئے مشاورت جاری ہے۔ عمران خان نے ایک سال کھوکھلی بڑھکوں میں ضائع کر دیا ہے۔ حکومت کے دعوے اور وعدے جھوٹے ثابت ہوئے۔ موجودہ حکومت اور پرانی حکومتوں میں کوئی فرق نہیں۔ موجودہ حکمرانوں نے پرانے حکمرانوں کی غلطیوں سے کوئی سبق نہیں سیکھا۔ قوم حکومت سے بیزار اور مایوس ہے۔