PIA کے فضائی میزبانوں کیلئے پرواز سے پہلے الکوحل ڈوپ ٹیسٹ لازمی قرار

اسلام ٹائمز۔ پاکستان انٹرنیشنل ائیر لائن (پی آئی اے) نے فضائی میزبانوں کے لیے پرواز سے پہلے الکوحل ڈوپ ٹیسٹ لازمی قرار دے دیا، ملکی و غیرملکی فلائٹ سے قبل عملے کو سانس کا معائنہ کروانا ضروری ہو گا۔ نوٹیفیکیشن کے مطابق کیبن کریو کیلئے سانس کا معائنہ لازم قرار دیا گیا ہے، اندرون و بیرون ملک تمام پروازوں پر تعینات کیبن کریو کو جہاز میں سوار ہونے سے قبل سانس کا معائنہ کروانا ہو گا۔ زرائع کے مطابق ٹیسٹ کا مقصد کریو میں الکوحل، نشہ آور اشیاء کے استعمال کی روک تھام ہے، کیبن کریو کے سانس کا معائنہ بریفنگ رومز میں ائیرلائن کے فلائٹ سرجنز اور میڈیکل آفیسر خود کریں گے۔ پی آئی اے میڈیکل ڈویژن کی کیبن کریو کیلئے جاری نئی ایڈوائزری فوری طور پر نافذالعمل ہو گی۔ واضح رہے اس سے قبل سول ایویشن اتھارٹی پائلٹس اور کاک پٹ عملے کے ٹیسٹ کر رہی ہے، اب پی ائی اے نے تمام پروازوں سے پہلے اپنے فضائی میزبانوں کے ٹیسٹ لازمی کرے گی۔ پی ائی اے انتظامیہ کے مطابق عالمی فلائٹ سیفٹی قواعد و ضوابط اور انٹرنیشنل سول ایویشن رولز کے تناظر میں پی ائی اے کی جانب سے یہ اقدام سامنے آیا ہے۔