اسلام ٹائمز۔ لیویز ذرائع کے مطابق نامعلوم شرپسند عناصر کی فائرنگ سے تربت میں ایک خاتون جانبحق ہوگئی، جبکہ اس کا شوہر زخمی ہوگیا ہے۔ تفصیلات کے مطابق فائرنگ کا واقعہ تربت کے علاقے آسکانی بازار آبسر میں پیش آیا ہے۔ پولیس اور ایف سی کے اہلکار موقع پر پہنچ گئے ہیں اور جائے وقوعہ کو گھیر لیا گیا ہے۔ اطلاعات کے مطابق پولیس اور ایف سی اہلکاروں کی طرف سے متاثرہ خاندان کو فوری امداد مہیا کر دی گئی ہے اور یقین دہانی کرائی گئی ہے کہ ملزمان کو جلد از جلد کیفر کردار تک پہنچایا جائے گا۔ دیگر ذرائع کے مطابق جاں بحق خاتون کے اہلخانہ نے ایف سی اہلکاروں پر فائرنگ کرنے اور عورت کو ہلاک کرنے کا الزام لگایا ہے۔ واقعہ کی مزید تفتیش کے بعد حتمی فیصلہ کیا جائے گا۔