گلگت بلتستان کی اہمیت، سازشیں اور راہ نجات

تحریر: محمد حسن جمالی

پاکستان کی ترقی کے خواہاں افراد کے لئے دنیا کے ترقی یافتہ ممالک کی ترقی کے رازوں کا عمیق مطالعہ کرنا ضروری ہےـ ان کی کامیابی اور ترقی کے رازوں میں سرفہرست تعلیم کو اہمیت دینا، جوانوں کی فکری صلاحیتوں کو نکھارنے کے لئے ٹھوس منصوبہ بندی کرنا، اداروں میں لائق و باصلاحیت افراد کا چناؤ کرکے بھرتی کرنا، ملک کے داخلی و بیرونی دشمن عناصر کے ناپاک عزائم سے آگاہ رہنا سمیت یہ راز بھی نمایاں دکھائی دیتا ہے کہ ترقی یافتہ ملکوں کے اقتدار اعلٰی کے مالکان اپنے ملک کے ان خطوں، شہروں اور علاقوں کو خصوصی توجہ و اہمیت دیتے ہیں، جن سے ملک کے امنیتی، سیاسی، ثقافتی اور اقتصادی مفادات کا تعلق گہرا ہوتا ہے، چنانچہ جن ممالک نے ابھی تک اس راز کو کشف نہیں کیا ہے یا تجاہل عارفانہ کا مظاہرہ کرتے ہوئے اسے نظرانداز کیا ہوا ہے وہ علم و ٹیکنالوجی اور ایٹمی طاقت سے لیس ہونے کے باوجود آج تک ترقی یافتہ ملکوں کی صف میں شامل ہونے سے قاصر نظر آتے ہیں۔ پاکستان کا شمار بھی انہی ملکوں میں ہوتا ہے کیونکہ  پاکستانی حکمران اور ایوان اقتدار کے کرسی نشین افراد اس حقیقت سے بخوبی واقف ہیں کہ گلگت بلتستان کا خطہ ہر لحاظ سے پاکستان کے لئے شہ رگ کی حیثیت رکھتا ہےـ ان کے لئے یہ بات بھی اظہر من الشمس ہے کہ بھارت پاکستان کا اصلی و ازلی دشمن ہے اور جو خطہ اس ازلی دشمن کے خطرات کے لئے ڈھال بنا ہوا ہے وہ گلگت بلتستان ہےـ

گرگل جنگ میں پاکستان کی حفاظت کے لئے اگر گلگت بلتستان کے جوانوں کی بے پناہ قربانیاں نہ ہوتیں، اگر اس معرکے میں گلگت بلتستان کے باسیوں کی مالی، جانی اور فکری توانائیوں کی فداکاریاں شامل نہ ہوتیں، تو اس جنگ میں ہرگز پاکستان کو فتح نہ ملتی، گلگت بلتستان کے جوانوں نے اپنے لہو کی قربانی دے کر پاکستان کو بھارت کے ہاتھوں مغلوب ہونے سے بچالیاـ اس کے علاوہ جہاں کہیں بھی پاکستان کی امنیت اور سالمیت خطرات کے کنویں کے دہانے پہنچی، گلگت بلتستان کے آرمی جوان سینہ تان کر آگے بڑھے اور اپنی صلاحیتوں کا مظاہرہ کرتے ہوئے پاکستان کی امنیت کو خطرات کے کنویں میں گرنے سے بچالیاـ توجہ رہے کہ کرگل جنگ میں پاکستان آرمی کی ویب سائیٹ ڈیفنس نے 350 جبکہ انڈیا ٹائمز نے 2900 این ایل آئی کے جوانوں کی شہادتوں کی خبر دی تھی اس جنگ میں پاکستان آرمی کے دوجوان نشان کا اعزاز حیدر حاصل کرنے میں کامیاب ہو گئے تھے۔ اس کے علاوہ این ایل آئی نے 1965ء کی جنگ میں 5 ستارہ جرات، 8 تمغہء جرات اور 25 امتیازی سند حاصل کر لی۔ جبکہ 1971ء کی جنگ میں 2 ستارہ جرائت، 8تمغہ جرائت ، 2 امتیازی سند حاصل کی گئی تھیں۔ پاکستان کی سرزمین پر انسانیت کے دشمن طالبان کی سرکوبی کے لئے جب حکومت نے آپریشن شروع کروائے تو اس میں بھی این ایل آئی کا رول سب سے زیادہ رہا ہےـ آپریشن المیزان، آپریشن راہ راست اور آپریشن ضرب عضب سب میں گلگت بلتستان کے شیر دل جوانوں سے ہی خدمات لی گئی۔

وطن عزیز پاکستان کی محبت میں دنیا کے بلند ترین محاذ جنگ سیاچن میں گلگت بلتستان کے جوان خوش و خرم پاکستان کی حفاظت کے لئے الرٹ رہتے ہیں، یہ بات بھی حائز اہمیت ہے کہ ''سیاچن'' میں ہر سال پاک فوج کے جوانوں کی ایک قابل توجہ تعداد برفانی تودے تلے دب کر لاپتہ ہو جاتے ہیں اور کچھ طوفانوں کی نذر ہو کر غائب ہوتے ہیں تو بہت سارے زخمی یا معزور ہوکر ہمیشہ کے لئے گھروں میں محصور رہنے پر مجبور ہوجاتے ہیں، جس کے نتیجے میں ان کی زندگی اجیرن بن کر رہ جاتی ہےـ یاد رہے کہ سیاچن گلیشیئر پر گرمیوں میں بھی درجہ حرارت منفی دس کے قریب رہتا ہے، جبکہ سردیوں میں منفی پچاس ڈگری تک جاپہنچتا ہے۔ جس کے سبب یہاں سال بھر کسی قسم کی زندگی کے پنپنے کا کوئی امکان نہیں رہتا۔ جو فوجی وہاں تعینات ہوتے ہیں ان کے لئے اس درجہ حرارت پر کھانا پینا ہی نہیں سانس لینا تک ایک انتہائی دشوار اور سخت ہوتا ہےـ 2012ء میں سیاچن کے گیاری سیکٹر میں بھی 80 فٹ اونچا اور ایک کلومیٹر طویل برفانی تودہ گرنے سے 11 شہریوں سمیت پاک فوج کے 128 فوجی شہید ہو گئے تھے۔ اگر وطن کی محبت ان کے دل میں نہ ہوتی تو کھبی بھی وہ سیاچن جیسے سرد مقامات پر حاضر رہنے کے لئے تیار نہ ہوتےـ گلگت بلتستان کی اہمیت کا دوسرا پہلو اس خطے کا آبی، سیاحتی اور معدنیات کی دولت سے مالا مال ہونا ہے، دریائے جہلم اور سندھ کے پانی سمیت پاکستان کے آبی ذخائر کا منبع گلگت بلتستان میں ہےـ اس علاقے کی پہاڑیاں قیمتی پتھروں سے بھری پڑی ہیں۔

گلگت بلتستان کو چین اور بھارت کے لئے ایشیاء کا گیٹ وے ہونے کی حیثیت حاصل ہے اور اسے مجموعی طور پر دنیا کی چھت بھی کہلاتا ہےـ اس کی سرحدیں مغرب میں پاکستان کے صوبہ خیبرپختونخواہ کے علاقے دیر، سوات، کوہستان اور کاغان ویلی سے ملتی ہیں۔ شمال مغرب میں واخان کی پٹی، شمال مشرق میں چین کا صوبہ سنکیانگ، جنوب مغرب میں مقبوضہ کشمیر اور جنوب مشرق میں بھارت واقع ہے۔ اگر پاکستان کی سرزمین پر سیر و تفریح کے لئے خوبصورت ترین مثالی جگہوں کی تلاش کریں تو بغیر کسی مبالغے کے سب کی نظر گلگت بلتستان کی طرف جاتی ہےـ یہی وجہ ہے کہ موسم گرما میں دنیا بھر سے سیاح گلگت بلتستان کا رخ کرتے ہیں، جہاں گرمیوں کے دو تین ماہ غیر ملکی اور ملک کے دور دراز شہروں سے آئے ہوئے سیاح مہمانوں کا رش رہتا ہےـ یہ گلگت بلتستان کی اہمیت کے بارے میں ایک مجمل خاکہ ہےـ سوال یہ پیدا ہوتا ہے کہ اتنی اہمیت کے حامل خطے کو پاکستان کے حکمرانوں نے کتنی اہمیت دی ہے؟ انتہائی افسوس کی بات ہے کہ ہمارے حکمرانوں نے اس اہم خطے پر خاطر خواہ کوئی توجہ نہیں دی۔ پورے ۷۱ سالوں سے انہوں نے اس کے ساتھ سوتیلی ماں جیسا سلوک روا رکھا، یہاں تک کہ اس طویل عرصے میں گلگت بلتستان کو قومی دھارے میں شامل کرکے اسے جائز حقوق تک دینے کی انہیں توفیق نہیں ملیـ حکمرانوں کی یہ بدسلوکی اس حقیقت کی عکاسی کرتی ہے کہ انہیں وطن عزیز کی ترقی کی کوئی فکر نہیں۔ وہ پاکستان کو ترقی یافتہ ممالک کے زمرے میں دیکھنے کے حوالے سے خاص دلچسپی نہیں رکھتے ہیں۔ پاکستان کی ترقی کا نعرہ ان کی زبان کی حد محدود ہے، وہ عملی طور پر پاکستان کی ترقی کے خواہاں نہیں۔ یہ بات بھی کسی پر مخفی نہیں رہنی چاہیئے کہ گلگت بلتستان کو حقوق سے محروم رکھنے میں جہاں پاکستانی حکمران مجرم ہیں وہیں اس محرومیت میں خود اس خطے کے باسیوں کی نااتفاقی، مایوسی، احساس کمتری، عدم احساس مسؤلیت، غفلت، خواب اور دوسروں کے مہرے بننا وغیرہ کا بھی بڑا عمل دخل رہا ہےـ آج تک اس اہم ایشو پر گلگت بلتستان کے پورے عوام اور خواص نے متحد و متفق ہوکر آواز بلند نہیں کی بلکہ اس حوالے سے ہمیشہ ایک گروہ ہی میدان میں سرگرم رہا ہے جو ہم سب کے لئے لمحہ فکریہ ہےـ