آل پارٹیز کانفرنس کا تفصیلی احوال

اپوزیشن نے اس بات پر بھی اتفاق کیا کہ احتجاج اور حکومت کو ٹف ٹائم دینے کے لئے جو حکمت عملی مرتب کی جائے گی، اسے قبول کیا جائیگا۔ یہ بھی طے کیا گیا ہے کہ حتمی فیصلے تمام تجاویز کو سامنے رکھتے ہوئے متفقہ اعلامیہ میں شامل کئے جائینگے۔ ذرائع کے مطابق آل پارٹیز کانفرنس کے متفقہ اعلامیہ کے لئے 11 رکنی کمیٹی قائم کردی گئی ہے، جس میں رحمت اللہ کاکڑ، اویس نورانی، شفیق پسروری، فرحت اللہ بابر، یوسف گیلانی، احسن اقبال، رانا ثناء اللہ، شاہد خاقان عباسی، میاں افتخار، سینیٹر عثمان خان اور ہاشم بابر شامل ہیں۔ کمیٹی تجاویز کی روشنی متفقہ اعلامیہ جاری کریگی۔ اعلامیہ کمیٹی اجلاس کررہی ہے جس میں وہ اعلامیہ کو مرتب کرکے قائدین کے سامنے پیش کریگی۔ اپنے صدارتی خطاب میں مولانا فضل الرحمٰن نے کہا کہ یہ دھاندلی زدہ حکومت ہے۔ دھاندلی کی تحقیقات کیلئے بنائی گئی کمیٹی کا کیا بنا؟ملک میں مہنگائی عروج پر پہنچ گئی ہے۔ انہوں نے کہا کہ عوامی مشکلات اورحکومت کے خاتمے کیلئے مل کر آگے بڑھنا ہو گا، حکومت کو گھر بھیجنے کیلئے سڑکوں پربھی آنا پڑا تو نکلنا چاہیئے۔

اپوزیشن لیڈر شہباز شریف  نے اے پی سے خطاب میں کہا کہ تمام اپوزیشن جماعتیں مل کرکسی لائحہ عمل پرمتفق ہوں، چوری کے ووٹوں سے حکومت بنی ہے۔ عوام کی تکالیف کی ترجمانی نہ کی توبہت بُرا ہوگا۔ انہوں نے کہا کہ حکومت کو گھر بھیجنے کیلئے ہر حربہ اختیارکرنا چاہیئے، عوام دشمن بجٹ نے لوگوں کی چیخیں نکال دی ہیں، بجٹ کو ناکام بنانے کیلئے ملکرجدوجہد کرنی چاہیئے۔ اے پی سی میں پاکستان پیپلزپارٹی، مسلم لیگ نواز، عوامی نیشنل پارٹی، قومی وطن پارٹی، نیشنل پارٹی اور پشتونخواہ ملی عوامی پارٹی  کے رہنما شریک ہیں۔ مسلم لیگ نون کے وفد کی قیادت نون لیگ کے صدر شہباز شریف کررہے ہیں، جبکہ سینئر نائب صدر شاہد خاقان عباسی ،نائب صدر مریم نواز اور راجہ ظفرالحق سمیت دیگر شریک ہیں۔ پاکستان پیپلز پارٹی کی طرف سے بلاول بھٹو، یوسف رضاگیلانی، قمر زمان کائرہ، شیری رحمان، قمر زمان کائرہ اور فرخت اللہ بابر سمیت دیگر شریک ہیں۔
اسفند یار ولی، محمود خان اچکزئی، آفتاب شیر پاؤ، میر حاصل بزنجو، ساجد میر سمیت دیگر جماعتوں کے رہنما بھی اجلاس میں شریک ہیں۔ دعوت کے باوجود جماعت اسلامی اور بی این پی مینگل  اجلاس میں شریک نہیں ہوئے۔

اجلاس میں شرکت کے لئے سب سے پہلے  میر کبیر شاہی اور میر حاصل خان بزنجو کی قیادت میں نیشنل پارٹی کا  وفد پہنچا۔ سینیٹر مولانا عطاء الرحمن نے اے پی سی میں شرکت کے لئے آنے والوں کا استقبال کیا۔ اسلام آباد کے مقامی ہوٹل میں ہونے والی اے پی سی کے لئے مولانا فضل الرحمٰن کیجانب سےتمام پارلیمانی اپوزیشن جماعتوں کو دعوت دی گئی ہے۔ آل پارٹیز کانفرنس کے ایجنڈے میں بجٹ منظوری کو رکوانے پر مشاورت، حکومت مخالف تحریک کیلئے جلسوں کے شیڈول پرمشاورت کے ساتھ ساتھ اسلام آباد لاک ڈاؤن کی تاریخ کا اعلان پر بھی مشاورت متوقع ہے۔ حکومت گرانے سے متعلق مشاورت اور چیئرمین سینٹ کے خلاف تحریک عدم اعتماد پر غور بھی ایجنڈے میں شامل ہے۔ اے پی سی کے اختتام پر باہمی مشاورت سے اعلامیہ  بھی جاری کیا جائے گا۔ وزیراعظم کی معاون خصوصی برائے اطلاعات ڈاکٹر فردوس عاشق نے کہاہے کہ اے پی سی کی شاہکار فلم سکرین پر آنے سے پہلے ہی اتر گئی۔ مفادات کی قیدی قیادت ہر مرتبہ مولانا کو بلا کر ان کی کرسی کھینچ لیتی ہے۔ سماجی رابطوں کی ویب سائٹ ٹوئٹر پر جاری اپنے بیان میں فردوس عاشق اعوان نے کہاہے کہ مولانا صاحب سے دلی ہمدردی ہے کیونکہ اپوزیشن کے ناتواں کندھے انکی سیاسی محرومی کا بوجھ اٹھانے کو تیار نہیں۔ ڈاکٹر فردوس عاشق اعوان نے مولانا فضل الرحمٰن کو مشورہ بھی دیا ہے۔ انہوں نے کہا کہ اے پی سی کی ناکامی کے بعد مولانا صاحب آئندہ چار سال کے لئے خود کو صرف دین کی خدمت کے لئے وقف کر دیں۔