نئی دہلی میں عالمی یوم القدس

اسلام ٹائمز۔ مجلس علماء ہند کے زیر اہتمام عالمی یوم قدس کے موقع پر آج جنتر منتر نئی دہلی پر ایک عظیم الشان ریلی کا انعقاد کیا گیا جس میں ہزاروں کی تعداد میں موجود مظاہرین نے مسجد اقصیٰ کی بازیابی، قبلہ اول بیت المقدس کے تحفظ اور عالمی سطح پر جاری دہشت گردی کی سخت مذمت کی۔ اس موقع پر خواتین اور بچوں نے بھی شرکت کی اور اپنے غم و غصہ کا اظہار کیا۔ مظاہرین کے ہاتھوں میں نعروں پر مبنی تختیاں تھیں جس میں اسرائیل کی بربریت کی اور فلسطین کی معصومیت کا نظارہ واضح طور پر ظاہرہو رہا تھا۔ اسرائیل کے مظالم کے خلاف ملت اسلامیہ نے وحدت اسلامیہ کا ثبوت پیش کیا اور ایک بار پھر اسلام دشمن طاقتوں کو یہ باور کرایا کہ ان کی سازشیں کسی بھی صورت میں کامیاب ہونے نہیں دی جائیں گی۔ اس موقع پر مختلف تنظیموں کے سربراہان اور ملت کے علماء و دانشوران نے احتجاجی ریلی سے خطاب بھی کیا۔ اس دوران میمورنڈم میں بھارتی وزیراعظم سے مطالبہ کیا گیا کہ ہندوستان کی پالیسی ہمیشہ فلسطین حامی رہی ہے لہٰذا حکومت اسرائیل سے متعلق اپنی خارجہ پالیسی پر نظر ثانی کرے، غزہ پٹی پر جاری اسرائیلی مظالم کو فوری طور پر بند کیا جائے اور غزہ کا محاصر ہ ختم کیا جائے، مظاہرین نے مزید مطالبہ کیا کہ حکومت ہند فلسطینی عوام کی مالی امداد کرے تاکہ اسرائیل کے ذریعہ مسمار کئے گئے ہزاروں فلسطینیوں کی باز آبادکاری کی جائے، حکومت ہند یمن میں جنگ بندی کے لئے اقدام کرے تاکہ ہزاروں بے گناہوں کا خون بہنے سے روکا جائے۔