فن لینڈ چند ہی روز میں باضابطہ طور پر نیٹو کا رکن بن جائے گا، جینز اسٹولٹن برگ

اسلام ٹائمز۔ سربراہ نیٹو جینز اسٹولٹن برگ نے کہا ہے کہ فن لینڈ چند ہی روز میں باضابطہ طور پر نیٹو کا رکن بن جائے گا۔ خبرساں ادارے اے ایف پی کی رپورٹ کے مطابق کئی ماہ کی تاخیر کے بعد ترکی کی پارلیمنٹ نے بالآخر فن لینڈ کی نیٹو اتحاد کا رکن بننے کی درخواست کی توثیق کردی۔ جینز اسٹولٹن برگ نے صدر فن لینڈ کو نیٹو میں شمولیت کی راہ میں حائل حتمی رکاوٹ دور کرنے پر مبارکباد دی۔انہوں نے کہا کہ میں آنے والے دنوں میں نیٹو ہیڈکوارٹر پر فن لینڈ کا جھنڈا بلند کرنے کا منتظر ہوں ایک ساتھ مل کر ہم زیادہ مضبوط اور محفوظ ہوں گے۔

جینز اسٹولٹن برگ نے ایک علیحدہ بیان میں کہا کہ فن لینڈ کے پاس انتہائی قابل فورسز، جدید صلاحیتیں اور مضبوط جمہوری ادارے ہیں لہٰذا فن لینڈ نیٹو اتحاد میں بہت اچھا اضافہ ہوگا۔ نیٹو کے وزرائے خارجہ اگلے ہفتے برسلز میں نیٹو اتحاد کے ہیڈکوارٹر میں اجلاس کریں گے، امکان ظاہر کیا جارہا ہے کہ اس اجلاس میں فن لینڈ کی رکنیت کو باضابطہ شکل دی جائے گی۔ یوکرین تنازع نے یورپی ممالک کی سلامتی کے حوالے سے شدید خدشات پیدا کردیے ہیں جن کے پیش نظر فن لینڈ اور اس کے ہمسایہ ملک سویڈن نیٹو اتحاد میں شامل ہوکر پناہ ڈھونڈنا چاہ رہے ہیں، تاہم، ترکیہ اور ہنگری کی جانب سے مسلسل مزاحمت کی وجہ سے سویڈن کی یہ درخواست تعطل کا شکار تھی۔