حکومت کیخلاف نعرے عوام کی آواز، اب امن نہیں ہوگا، ہنگامہ آرائی چلتی رہے گی، چوہدری نثار

اسلام ٹائمز۔ قائد حزب اختلاف چوہدری نثار علی خان نے کہا ہے کہ حکومت چار سال میں پاکستان کي ترقی کے حوالے سے ايک انچ بھی آگے نہيں بڑھ سکي، چار سال ميں مہنگائی کا بوجھ ڈبل ہوا ہے، مہنگائي اور لوڈشيڈنگ ميں اضافہ ہوا ہے، حکمران عوام کي محروميوں کا مذاق اڑا رہے ہيں، اپوزيشن عوام سے لاتعلق نہيں ہو سکتی۔ انہوں نے کہا کہ اسمبلی میں جو کچھ ہوا اس پر وہ بھی خوش نہیں، لیکن بےحس حکمرانوں کو جگانے کیلئے اس کے سوا کوئی چارہ نہیں تھا۔

چوہدری نثار کا کہنا تھا کہ وزير خزانہ نے جو کہا وہ عوام کی آواز نہيں تھی، حکومت گونگی، بہری ہو جائے تو عوام کی آواز اسمبلی تک پہنچانا ضروری ہوتا ہے۔ آج اسمبلی ميں پاکستان کے عوام کي آواز پہنچائی۔ انہوں نے کہا کہ چوہدری نثار علی خان نے کہا کہ وزیر خزانہ نے کل ناکاميوں کا اعتراف کيا، آج کس منہ سے بجٹ پيش کيا، انہوں نے کہا کہ خاندان کے خاندان بدعنوانیوں میں غرق ہیں، پاکستان ميں کرپشن کا کنسورشيم کام کر رہا ہے۔

دیگر ذرائع کے مطابق قومی اسمبلی میں اپوزیشن لیڈر چوہدری نثار نے واضح کیا ہے کہ اسمبلی میں اب امن نہیں ہو گا، باقی ماندہ مدت میں ہنگامہ آرائی چلتی رہے گی۔ اجلاس کے بعد میڈیا سے گفتگو کرتے ہوئے چوہدری نثار نے حکمرانوں کو ہارے ہوئے جواری قرار دیا۔ چوہدری نثار کا کہنا تھا کہ حکومت شرافت کی زبان نہیں سمجھتی۔ آئندہ اجلاس میں صدر کو نشانہ بنایا جائے گا۔ اپوزیشن لیڈر نے کہا کہ عوام دو وقت کی عزت کی روٹی کو ترس رہے ہیں اور حکمران عیاشیوں میں مصروف ہیں۔