نئے انتخابات سے ہی ملک کے حالات بدلے جا سکتے ہیں، ڈاکٹر عبدالقدیر خان

اسلام ٹائمز۔ تحریک تحفظ پاکستان کے سربراہ و ممتاز ایٹمی سائنسدان ڈاکٹر عبدالقدیر خان نے کہا ہے کہ تمام سیاستدان اپنا قبلہ درست کریں، نئے انتخابات سے ہی ملک کے حالات بدلے جا سکتے ہیں اور عوام ووٹ کا استعمال قومی فریضہ سمجھ کر کریں، ملک کو درپیش چیلنجز سے نپٹنے کیلئے قوم کو متحد ہونا ہو گا۔ ان خیالات کا اظہار انہوں نے پاکستان جسٹس پارٹی کے زیراہتمام تقریب سے خطاب کرتے ہوئے کیا۔

ڈاکٹر عبدالقدیر خان نے کہا کہ عوام کو روٹی کپڑا اور مکان تو ملا نہیں اگر اب ووٹ دیا تو پانی اور گھاس بھی نہیں ملے گا، عوام اپنا ووٹ سوچ کر استعمال کریں، الیکشن پر ووٹ ڈالنے جائیں پکنک منانے نہ جائیں۔ انہوں نے کہا کہ ملک تباہ ہو رہا ہے اسے مل کر بچانا ہو گا، نادہندہ اور کرپٹ لوگوں کو ووٹ نہ دیں کوئی بھی جماعت ہو اچھے لوگوں کو ٹکٹ دیں۔ انہوں نے کہا کہ توانائی بحران کی وجہ سے صنعت تباہ ہو رہی ہے جبکہ حکومتوں میں کرپشن اپنے عروج پر ہے، سیاستدانوں کو اپنا قبلہ درست کرنا ہو گا۔