اسلام ٹائمز۔ وزارت داخلہ کی جانب سے خبردار کیا گیا ہے کہ کالعدم تحریک طالبان پاکستان کی جانب سے ملک کے شمالی پہاڑی علاقے میں سیاحوں پر حملوں کی منصوبہ بندی کی جاسکتی ہے۔ جہاں گزشتہ سال دس غیر ملکی کوہ پیماؤں کو قتل کیا گیا۔ وزارت داخلہ کے ایک سینئر اہلکار نے نام ظاہر نہ کرنے کی شرط پر بتایا کہ وزارت داخلہ نے باضابطہ طور پر گلگت بلتستان کو آگاہ کیا ہے کہ طالبان خطے میں حملے کر سکتے ہیں۔ ایک اور اہلکار نے بھی نام ظاہر نہ کرنے کی شرط پر اس انتباہ کی تصدیق کی۔ دوسری جانب گلگت بلتستان پولیس کا کہنا ہے کہ انہیں طالبان کی جانب سے کسی قسم کے مخصوص خطرے کا علم نہیں ہے تاہم وہ الرٹ ہیں۔