کیانی، پاشا اور نواز شریف نے ہمارے لیے مشکلات پیدا کیں، یوسف گیلانی

اسلام ٹائمز۔ سابق وزیراعظم یوسف رضا گیلانی نے کہا ہے کہ جب ہم اقتدار میں تھے تو اسٹیبلشمنٹ نے ہمیں چلنے نہیں دیا، ایک طرف احمد شجاع پاشا اور اشفاق پرویز کیانی تھے جبکہ دوسری طرف نوازشریف کالا کوٹ پہن کر عدالت چلے گئے۔ اسلام آباد میں میڈیا سے بات کرتے ہوئے سابق وزیراعظم یوسف رضا گیلانی نے کہا کہ ہم مستحکم اداروں کو کمزور نہیں کر سکتے، تاہم اس وقت پارلیمنٹ بہت کمزور اور باقی ادارے مضبوط ہیں اس لیے نوازشریف کو چاہئے کہ وہ کمزور پارلیمنٹ کو مضبوط کریں، کیونکہ ملک کسی تصادم کا متحمل نہیں ہو سکتا۔ انہوں نے کہا کہ جب ہم اقتدار میں تھے تو اسٹیبلشمنٹ نے ہمیں نہیں چلنے دیا،ایک طرف احمد شجاع پاشا اور اشفاق پرویز کیانی تھے تو دوسری طرف نوازشریف کالا کوٹ پہن کر عدالت پہنچ گئے جبکہ ہمارے دور میں افتخار چوہدری اور پرویز مشرف بھی تھے۔

یوسف رضا گیلانی نے کہا کہ سابق سفیر حسین حقانی سے 3 دن میں استعفیٰ لے کر میمو گیٹ کا مسئلہ حل کیا لیکن اس کے باوجود نوازشریف پھر بھی عدالت گئے۔ ان کا کہنا تھا کہ سابق صدر آصف زرداری کے 4 حلقوں سے متعلق بیان پر پارٹی ان کےساتھ ہے۔