اسلام ٹائمز۔ متحدہ قومی موومنٹ کی جانب سے کراچی کے نامزد میئر وسیم اختر کو سندھ ہائیکورٹ پہنچا دیا گیا۔ تفصیلات کے مطابق ڈاکٹر عاصم حسین کیس میں گرفتار ملزم وسیم اختر کو آج سندھ ہائیکورٹ میں پیش کیا گیا تاہم عدالتی وقت ختم ہونے کے باعث انہیں عدالت میں پیش نہیں کیا جا سکا۔ ذرائع کا کہنا ہے کہ عدالتی وقت ختم ہونے کی وجہ سے وسیم اختر کا ریمانڈ حاصل نہیں کیا جا سکا اور جج کی غیر حاضری کے باعث انہیں واپس سینٹرل جیل منتقل کر دیا گیا ہے۔ ذرائع نے مزید بتایا کہ انسداد دہشت گردی کی عدالتوں کے منتظم جج جا چکے تھے جس وجہ سے انہیں عدالت میں پیش نہیں کیا جا سکا۔