اسلام ٹائمز۔ لاہور ہائیکورٹ نے اثاثہ جات کیس میں پی ٹی آئی رہنما اور سابق صوبائی وزیر عبدالعلیم خان کی درخواست ضمانت پر محفوظ فیصلہ سنا دیا۔ عدالت نے عبدالعلیم خان کی درخواست ضمانت منظور کرلی۔ لاہور ہائیکورٹ میں پی ٹی آئی رہنما عبدالعلیم خان کی اثاثہ جات کیس میں درخواست ضمانت پر سماعت ہوئی۔ جسٹس علی باقر نجفی کی سربراہی میں 2 رکنی بنچ نے سماعت کی۔ علیم خان نے بیرسٹر علی ظفر کی وساطت سے درخواست ضمانت دائر کی تھی۔ عدالت نے فریقین کے وکلا کے دلائل سننے کے بعد درخواست ضمانت پر فیصلہ محفوظ کر لیا تھا، عدالت نے محفوظ فیصلہ سناتے ہوئے پی ٹی آئی رہنما کی درخواست ضمانت منظور کی اور ایک کروڑ کے ضمانتی مچلکے جمع کرانے کا حکم دیدیا۔