بلاول بھٹو دوبارہ اقتدار کے خواب نہ دیکھیں، شوکت یوسفزئی

اسلام ٹائمز۔ صوبائی وزیر اطلاعات خیبر پختونخوا شوکت یوسفزئی کا کہنا ہے کہ بلاول بھٹو دوبارہ اقتدار کے خواب نہ دیکھیں اور مولانا پارلیمنٹ سے باہر رہ کر ہی گزارہ کریں۔ بلاول بھٹو زرداری اور مولانا فضل الرحمٰن کے بیانات پر ردعمل کا اظہار کرتے ہوئے صوبائی وزیر اطلاعات خیبر پختونخوا شوکت یوسفزئی کا کہنا تھا کہ بلاول دوبارہ اقتدار کے خواب نہ دیکھے، عوام چوروں کو جیل میں دیکھنا چاہتے ہیں، اپوزیشن نے 25 جولائی کو کیا تیر مارا، اپوزیشن احتساب سے بچنے کیلئے انتشار پھیلا رہی ہے۔ شوکت یوسفزئی نے کہا کہ اپوزیشن جماعتوں میں مایوسی پھیل رہی ہے، جبکہ مولانا فضل الرحمٰن کو فتویٰ دینے کیلئے رکھا گیا ہے، مولانا پارلیمنٹ سے باہر رہ کر ہی گزارہ کریں جبکہ باپ کی کرپشن کو تحفظ دینے پر بلاول اور مریم کا گراف گر چکا ہے۔