سوڈان کے سابق صدر عمرالبشیر کو کرپشن پر 2 سال کی سزا

عدالت نے اپنے حکم میں کہا کہ عمرالبشیر کے گھر سے برآمد ہونے والے 60 لاکھ 90 ہزار یورو، 3 لاکھ 51 ہزار 770 امریکی ڈالر اور 50 لاکھ 70 ہزار سوڈانی پاؤنڈز(ایک لاکھ 28 ہزار ڈالر) کو بھی ضبط کر لیا جائے۔ سوڈانی پروفیشنلز ایسوسی ایشن نے ٹویٹر میں اپنے بیان میں عدالتی فیصلے کا خیر مقدم کیا تھا، عمرالبشیر کے خلاف احتجاج کی قیادت شروع میں اسی گروپ نے کی تھی۔ ان کا کہنا تھا کہ عمرالبشیر کے خلاف مزید مقدمات بھی ہیں، جس میں انہیں جواب دینا ہے اور وہ ان کا کام مکمل نہیں ہوا۔
دوسری جانب عمرالبشیر کے وکیل احمد ابراہیم نے کہا کہ سابق صدر فیصلے کے خلاف اپیل کریں گے۔ عدالت کے باہر سابق صدر کے حامیوں کی بڑی تعداد بھی جمع ہوئی تھی، جو ان کے حق میں نعرے بازی کر رہے تھے۔ طویل عرصے تک سوڈان میں حکمرانی کرنے والے عمرالبشیر کو رواں برس اپریل میں عوام کے طویل احتجاج کے نتیجے میں فوج نے معزول کر دیا تھا، جس کے بعد ان کے خلاف کرپشن کے مقدمات قائم کیے گئے تھے۔

عمرالبشیر کو معزول کرنے کے بعد فوج نے اقتدار اپنے ہاتھ میں لیا تھا، جس پر احتجاج میں مزید شدت آگئی تھی اور مظاہرین نے مطالبہ کیا تھا کہ فوج حکومت چھوڑ کر واپس چلی جائے اور سویلین افراد کو حکومت کا حق دیا جائے، جس پر فوج کو معاہدہ کرنا پڑا تھا۔ فوج نے 3 جون کو مظاہرین پر گولیاں بھی برسائی تھیں، جس کے نتیجے میں کئی افراد مارے گئے، تاہم اس تشدد کے ذمہ دار کئی فوجیوں کو برطرف کر دیا گیا تھا۔ فوجی کونسل اور سیاسی رہنماؤں کے درمیان کئی ماہ تک مذاکرات جاری رہے اور اگست میں مشترکہ حکومت سازی کو معاہدہ ہوا، جس پر دونوں فریقین نے دستخط کیے تھے۔ سوڈان میں اس وقت سویلین اور فوجی کونسل کی مشترکہ حکومت قائم ہے، جس کو بتدریج حکومت سویلین کے ہاتھوں منتقل کرنے کی ذمہ داری دی گئی ہے۔