طالبان کا افغان فوج کی چیک پوسٹ پر حملہ، 7 اہلکار جاں بحق

اسلام ٹائمز۔ افغانستان میں طالبان جنگجوؤں نے فوجی چیک پوسٹ پر دھاوا بول دیا، جس کے نتیجے میں افغان فوج کے 7 اہلکار جاں بحق ہوگئے۔ بین الاقوامی خبر رساں ادارے کے مطابق افغانستان کے صوبے بلخ کے ضلع دولت آباد کی فوجی چیک پوسٹ پر موٹر سائیکل سوار طالبان جنگجوؤں نے حملہ کردیا، جس کے نتیجے میں 7 اہلکار جاں بحق اور 6 شدید زخمی ہوگئے۔ طالبان جنگجو حملے کے بعد افغان فوج کا سارا اسلحہ بھی ساتھ لے گئے۔ ترجمان طالبان ذبیح اللہ مجاہد نے حملے کی ذمہ داری قبول کرتے ہوئے افغان فوج کے ایک کمانڈر سمیت 20 اہلکاروں کی ہلاکت کا دعویٰ کیا ہے جبکہ جنگجو افغان فوج کے 4 اہلکاروں کو بھی اپنے ہمراہ قید کر کے لے گئے۔ قبل ازیں طالبان جنگجوؤں نے فوجی گاڑی پر حملہ کرکے ایک امریکی فوجی کو ہلاک کر دیا تھا۔

ادھر کیمپ مارمل میں تعینات جرمنی انٹیلی جنس حکام نے انکشاف کیا ہے کہ فوجی کیمپوں اور تنصیبات پر رواں سال حملوں میں تیزی دیکھنے میں آئی ہے اور جنوری 2019ء میں سب سے زیادہ حملے کئے گئے۔ واضح رہے کہ امریکا اور افغان طالبان کے درمیان ہونے والے امن مذاکرات کو طالبان کے حملے میں امریکی فوجی کی ہلاکت پر صدر ٹرمپ نے ستمبر میں معطل کردیئے تھے، جو 3 ماہ بعد بحال ہی ہوئے تھے کہ امریکی بیس پر حملے کے بعد دوبارہ تعطل پیدا ہوگیا ہے۔