کوئٹہ، شدید سردی میں بوٹ پالش کرنیوالے معصوم بچے کی ویڈیو سوشل میڈیا پر وائرل

اسلام ٹائمز۔ کوئٹہ کی شدید سردی میں فٹ پاتھ پر بوٹ پالش کرنے والے 6 سالہ بچے کی ویڈیو سوشل میڈیا پر وائرل ہونے کے بعد صوبائی حکومت نے اس کی کفالت کا اعلان کر دیا ہے۔ ترجمان حکومت بلوچستان لیاقت شاہوانی کے مطابق وزیراعلٰی کو ویڈیو دیکھ کر بہت دکھ ہوا، جس کے بعد اس بچے کو تلاش کرنے کی کوشش کی گئی، مگر وہ نہیں ملا، تاہم ہم اسے تلاش کر لیں گے۔

انہوں نے بتایا کہ وزیراعلٰی بلوچستان نے بوٹ پالش کرنے والے اس چھ سالہ بچے کی کفالت کرنے کا اعلان کیا ہے۔ صوبائی حکومت کے ترجمان لیاقت شاہوانی کا کہنا تھا کہ ہم اس طرح کام کرنے والے دوسرے بچوں سے بھی ہر ممکن تعاون کریں گے۔

واضح رہے کہ 6 سالہ بچہ کافی عرصہ سے بلوچستان ہائیکورٹ کے باہر فٹ پاتھ پر بوٹ پالش کرتا ہے جس کی گذشتہ روز برف بھرے فٹ پر بیٹھے پالش کرنے کی ویڈیو وائرل ہوئی تھی۔