اسلام ٹائمز۔ سندھ حکومت نے پانی پر نیا ٹیکس عائد کرنے کا فیصلہ کیا ہے، جس کے تحت زیرِ زمین پانی استعمال کرنے پر واٹر ٹیکس لگے گا۔ تفصیلات کے مطابق سندھ حکومت نے صوبے میں پانی پر نیا ٹیکس عائد کرنے کا فیصلہ کیا ہے، ذرائع کے مطابق زیرِ زمین پانی استعمال کرنے پر واٹر ٹیکس لگے گا، جبکہ مجوزہ واٹر ٹیکس کیلئے سفارشات پر مبنی مسودہ تیار کرلیا گیا ہے۔ صوبائی محکمہ بلدیات کے حکام سندھ واٹر ٹیکس ایکٹ پر آج کابینہ ارکان کو بریفنگ دیں گے، جبکہ فی لیٹر ایک روپیہ واٹر ٹیکس عائد کرنے کی تجویز دی گئی ہے، جو منرل واٹر تیار کرنے والی صنعتوں سے فی لیٹر واٹر ٹیکس وصول کیا جائے گا، واٹر ٹیکس کا اطلاق سافٹ ڈرنک بنانے والی کمپنیز پر بھی ہوگا، جبکہ واٹر ٹیکس کی مد میں جمع شدہ آمدن کراچی واٹر بورڈ اور واسا میں تقسیم کی جائے گی۔