دیرپا امن و استحکام کیلئے دہشتگردی کے خلاف جنگ جاری رہے گی، آرمی چیف

اسلام ٹائمز۔ آرمی چیف جنرل قمر جاوید باجوہ کا کہنا ہے کہ دیرپا امن و استحکام کے لیے دہشت گردی کے خلاف جنگ جاری رہے گی۔ پاک فوج کے شعبہ تعلقات عامہ آئی ایس پی آر کے مطابق آرمی چیف جنرل قمر جاوید باجوہ کرنل مجیب الرحمان شہید کے گھر پہنچے اور اہلخانہ سے کرنل کی شہادت پر تعزیت کا اظہار کیا۔ آرمی چیف جنرل قمر جاوید باجوہ کا کہنا تھا کہ ہمارے افسروں اور جوانوں کی قربانیاں کبھی رائیگاں نہیں جائیں گی۔ آئی ایس پی آر کے مطابق آرمی چیف اور اہلیہ نے شہید کرنل کے ایصال ثواب کے لیے فاتحہ خوانی اور کرنل مجیب الرحمن شہید کے اہلخانہ سے تعزیت کی۔ یاد رہے کہ کرنل مجیب الرحمان نے ٹانک میں آئی بی او کے دوران جام شہادت نوش کیا تھا۔

سیکیورٹی فورسز نے ڈیرہ اسماعیل خان میں بڑی کارروائی کرتے ہوئے 2 انتہائی مطلوب دہشتگرد ہلاک کر دیئے، فائرنگ کے تبادلے میں کرنل مجیب الرحمان شہید ہوگئے تھے۔ آئی ایس پی آر کے مطابق فورسز نے علاقے کا گھیراو کیا تو دہشت گردوں نے فائرنگ شروع کردی، جس کے بعد فورسز کی جوابی کارروائی میں 2 دہشت گرد مارے گئے جب کہ ان کے ٹھکانے سے بڑی تعداد میں اسلحہ اور ایمونیشن برآمد کیا گیا تھا۔