عنقریب وزیراعظم عمران خان صدر مملکت کو لکھیں گے کہ اسمبلیاں توڑ دو، ناصر حسین شاہ

اسلام ٹائمز۔ وزیر اطلاعات سندھ ناصر حسین شاہ کا کہنا ہے کہ عنقریب وزیراعظم عمران خان صدر مملکت کو لکھیں گے کہ اسمبلیاں توڑ دو۔ رپورٹ کے مطابق صوبائی وزیر اطلاعات ناصر حسین شاہ کا کہنا ہے کہ اللہ رحم کرے جس چیز پر وزیراعظم نے نوٹس لیا اس نے بڑا حشر برپا کیا، دعاگو ہیں مہنگائی کنٹرول ہو اس کا اثر غریب آدمی پر پڑتا ہے۔ انہوں نے کہا کہ یہ سمجھ جائیں گے کہ یہ ان کے بس کی بات نہیں، وفاق کو سندھ کے جزائر پر قبضہ کرنے ہر گز نہیں دیں گے، صرف سندھ نہیں بلوچستان کی ساحلی پٹی کے جزائر بھی شامل ہیں۔ ناصر حسین شاہ نے کہا کہ جزائر پر قبضے کے خلاف احتجاج کرنے والے اپنی آواز میں آواز ملا رہے ہیں، جو گرفتاریاں ہوئی ہیں ان کو رہا کردیا جائے گا۔ وزیر اطلاعات سندھ کا کہنا ہے کہ پی ڈی ایم کی تحریک سے حکومت کو تارے نظر آنا شروع ہوگئے ہیں۔