اسلام ٹائمز۔ صدر مملکت ڈاکٹر عارف علوی نے نجی ٹی وی کیساتھ انٹرویو میں کہا ہے کہ وزیراعظم کوئی بھی صورت ہو اسمبلیاں تحلیل کرنے کا نہیں کہیں گے، میں وزیراعظم کو اعتماد کا ووٹ لینے کا بھی نہیں کہوں گا، سینیٹ اوپن بیلٹ ریفرنس پر سپریم کورٹ سے بہتر فیصلے کی امید ہے، آصف زرداری اور اخلاقیات دو الگ چیزیں ہیں، صدر اور وزیراعظم کرپشن پر سمجھوتا نہیں کریں گے۔ ٹی وی کے پروگرام میں اظہار خیال کرتے ہوئے صدر مملکت نے کہا کہ سینیٹ کے الیکشن کے نتائج پر قومی اسمبلی تحلیل نہیں ہوگی، وزیراعظم سینیٹ کے الیکشن کے نتائج پر اسمبلیاں توڑنے کا بھی نہیں کہیں گے، سینیٹ میں نتیجہ کچھ بھی ہو وزیراعظم کو اعتماد کا ووٹ لینے کا نہیں کہوں گا۔ صدر مملکت نے کہاکہ دو ڈھائی سال میں میرا اور عمران خان کا کسی چیز پر اختلاف رائے نہیں ہوا۔ ایک سوال پر صدر نے کہا کہ جہانگیر ترین کی پارٹی کے ساتھ وفاداری اپنی جگہ قائم ہے۔ عارف علوی نے کہا کہ پی ڈی ایم کی تحریک غلطیوں کی وجہ سے ناکام ہوگی۔