مسئلہ فلسطین ہر پاکستانی کے دل کے قریب ہے

متعلقہ فائیلیںاسلام ٹائمز۔ اسلام آباد پالیسی انسٹی ٹیوٹ کے زیر اہتمام ویبینار "مسلم دنیا اور فلسطین کا مستقبل" منعقد ہوا، جس میں فلسطین فاونڈیشن پاکستان کے سربراہ صابر ابو مریم اور ترجمان دفتر خارجہ زاہد حفیظ سمیت اہم شخصیات نے خطاب کیا۔ ترجمان دفتر خارجہ زاہد حفیظ نے اپنے خصوصی خطاب میں کہا کہ مسئلہ فلسطین نہ صرف حکومت پاکستان کی ترجیح ہے بلکہ ہر پاکستانی کے دل کے بہت قریب ہے اور یہ مسئلہ انسانی حقوق کے تناظر میں انتہائی اہم ہے۔ ویبنیار سے خطاب کرتے ہوئے زاہد حفیظ کا کہنا تھا کہ پاکستان کی فلسطینی عوام کے لئے غیر متزلزل حمایت اتنی ہی پرانی ہے، جتنا پرانا یہ ملک ہے، حکومت پاکستان اور عوام فلسطینیوں کی منصفانہ جدوجہد کے حامی رہے ہیں، پاکستان 1988ء میں فلسطین کو تسلیم کرنے والے اولین ممالک میں شامل ہے۔

ترجمان دفتر خارجہ نے کہا کہ پاکستان نے تمام عالمی فورمز اور او آئی سی پر فلسطین سے متعلقہ قراردادوں کی حمایت کی ہے، مسئلہ فلسطین ہی اسلامی سربراہی کانفرنس کے جنم کا باعث بنا ہے۔ ہم عالمی قوانین کے تحت ”حق خودارادیت“ پر اصولی موقف رکھتے ہیں۔ مقبوضہ فلسطینی علاقوں میں انسانی حقوق کی خلاف ورزیوں پر سخت تحفظات ہیں۔ فلسطین کے عوام کے لئے پاکستان کی حمایت بہت پرانی ہے۔ حکومت اور پاکستان کی عوام ان کی جدوجہد میں ہمیشہ فلسطینی عوام کے شانہ بشانہ کھڑے ہیں۔ پاکستان نے اقوام متحدہ اور او آئی سی سمیت تمام بین الاقوامی سطح پر فلسطین سے متعلق ہر قرارداد کی سرپرستی، شریک کفالت یا حمایت کی ہے۔ پاکستان نے اقوام متحدہ کی جنرل اسمبلی قرارداد کی باہمی تعاون سے، فلسطین کو 2012ء میں اقوام متحدہ کی ایک غیر ممبر مبصر ریاست میں اپ گریڈ کیا۔

مسئلہ فلسطین ہمارے لئے متعدد وجوہات کی بناء پر اہم ہے۔ ایک یہ کہ مسئلہ مسلم دنیا کی ایک اہم ترین وجہ کی نمائندگی کرتا ہے، جس کی وجہ سے اصل میں او آئی سی کی تشکیل ہوئی۔ دوسرا ہم لوگوں کے حق خودارادیت کے بارے میں اصولی مؤقف رکھتے ہیں۔ یہ ایک بنیادی حق ہے جسے بین الاقوامی قانون نے تسلیم کیا ہے۔ پاکستان اقوام متحدہ کی جنرل اسمبلی کے سالانہ اجلاس میں لوگوں کے حق خودارادیت کے بارے میں ایک قرارداد کی کفالت کرتا ہے۔ تیسرا یہ مسئلہ انسانی حقوق کے نقطہ نظر سے بھی اہم ہے۔ فلسطین، کشمیر ہو یا کہیں اور، مقبوضہ علاقوں میں عوام کے بنیادی حقوق کے تحفظ کی ضرورت کو ہمیشہ پاکستان نے سمجھا ہے۔ ہم فلسطینی مقبوضہ فلسطینی علاقوں میں جاری انسانی حقوق کی مسلسل پامالیوں پر گہری تشویش کا اظہار کرتے ہیں۔

فلسطینی عوام نے ان خلاف ورزیوں کو سات دہائیوں سے برداشت کیا ہے۔ بدقسمتی ہے کہ رمضان کے مقدس مہینے میں ہم نے فلسطینی عوام کے حقوق کی خلاف ورزی کرتے ہوئے دیکھا ہے۔ اسرائیلی قابض فورس کے ذریعے کسی بھی طرح کے مظالم فلسطینی عوام کے عزم کو متزلزل نہیں کرسکتے، ہم فلسطینی عوام کے حق خودارادیت کے ناقابل تسخیر حق کی پوری حمایت کرتے ہیں۔ انہوں نے مزید کہا کہ ہم فلسطینی عوام کے ناگزیر حقوق کے حصول اور آزاد ریاست کے قیام کے لئے جدوجہد میں ان کی مکمل حمایت جاری رکھیں گے۔ قارئین محترم آپ اس ویڈیو سمیت بہت سی دیگر اہم ویڈیوز کو اسلام ٹائمز کے یوٹیوب چینل کے درج ذیل لنک پر بھی دیکھ اور سن سکتے ہیں۔ (ادارہ)