اسلام ٹائمز۔ وزیراعظم نواز شریف نے کہا ہے کہ پاکستان میں نعروں اور دھرنوں کی سیاست کی کوئی گنجائش نہیں، اب انقلاب آئے گا تو صرف جمہوریت سے آئے گا، چند ہزار لوگ کروڑوں عوام کی جمہوریت کو ڈی ریل نہیں کرسکتے۔ جدہ میں صحافیوں سے گفتگو میں وزیراعظم نے کہا کہ پاکستان نے 65 سالوں میں فوجی انقلاب سمیت کئی انقلاب دیکھ لیے، اب کسی انقلاب کی گنجائش نہیں، موجودہ حکومت کروڑوں عوام کے مینڈیٹ سے اقتدار میں آئی ہے، اسے چند ہزار لوگ یرغمال نہیں بنا سکتے۔ انہوں نے کہا کہ ہم نے مذاکرات کے دروازے ہمیشہ کھلے رکھے ہیں، 14 اگست بھی گزر جائے گا، تمام سنجیدہ پارٹیاں ذمے داری کا مظاہرہ کر رہی ہیں اور جمہوریت پر یقین رکھتی ہیں، انہوں نے ماضی سے سبق سیکھا ہے۔