اسلام ٹائمز۔ ملک بھر کے مختلف شہروں میں تاجروں اور مزدورں نے حکومت کی جانب سے عائد کردہ ہوشربا ٹیکسز کے خلاف مکمل طور پر شٹر ڈاؤن ہڑتال کی۔ مختلف شہروں میں دکانیں بند اور کاروبار زندگی معطل رہا۔ دن کے اول حصے میں مختلف تاجر تنظیموں کی جانب سے پرامن احتجاجی ریلیاں نکالی گئیں۔ جن سے خطاب کرتے ہوئے تاجر تنظیموں کے عہدیداروں نے حکومت کی جانب سے عائد کردہ ٹیکسز کو عوام کے ساتھ ظلم و زیادتی قرار دیا۔ مقررین کا کہنا تھا کہ روز بروز بڑھتی مہنگائی اور حکومت کی جانب سے ٹیکسز میں مسلسل اضافہ حکومتی نااہلی کا ثبوت ہے۔