بھارت و پاکستان کے سربراہان ایک دوسرے کیخلاف تلخ بیان بازی سے گریز کریں، ڈاکٹر فاروق عبداللہ

اسلام ٹائمز: بھاجپا سے وابستہ افراد وادی کشمیر کو تقسیم کرنیکے درپے ہیں، انکی ایک کوشش یہ بھی ہے کہ مقبوضہ کشمیر کو حاصل خصوصی درجہ دفعہ 35 اے کو ہٹایا جائے، اس حوالے سے آپکی تشویش جاننا چاہیں گے۔؟
ڈاکٹر فاروق عبداللہ: تقسیم کی بات صرف وادی کشمیر میں ہی کیوں۔ جموں اور  لداخ میں کوئی تیسرا فرنٹ کیوں نہیں بنایا جاتا، وہاں کیوں ووٹوں کی کوئی تقسیم نہیں ہوتی، لیکن جب پیسے دیکر کوئی تیسرا فرنٹ قائم کیا جاتا ہے تو وہ وادی کشمیر میں کیا جاتا ہے۔ یہ سب ہماری آواز کو کمزور کرنے کے لئے ہوتا ہے۔ بھارت کی کوشش رہے گی کہ کشمیر میں گلی گلی لیڈر کھڑا ہو، تاکہ یہاں ایک آواز میں کوئی بات نہ کرسکے۔ بھارت کی کوشش رہے گی کہ ہمیں اس طرح کمزور کیا جائے، ہماری آواز کو دبایا جائے۔ وہ چاہتے ہیں کہ ہماری آواز بکھر جائے، تاکہ پھر وہ ہمارے ساتھ سازشیں کریں، چاہیئے وہ 35 اے کی سازش ہو یا پھر 370 کی سازش ہو۔ آج اگر بی جے پی اور آر ایس ایس والے ہمارے سر پر سوار ہیں، وہ اس لئے کہ ہم نے اُن کو اپنے ووٹوں کی تقسیم سے یہاں پہنچایا ہے۔

اسلام ٹائمز: کشمیر اور کشمیریوں کے حوالے سے بھاجپا اور دیگر ہندو انتہا پسند عناصر کی شدت پسندی کے حوالے سے کیا کہنا چاہیں گے۔ آخر کشمیریوں کا قصور کیا ہے۔؟
ڈاکٹر فاروق عبداللہ: میں پہلے بھی بھارتی حکومت کو مخاطب کرکے کہہ چکا ہوں کہ گالی یا گولی نہیں بلکہ کشمیریوں کو گلے لگا کر نزدیک لایا جائے۔ آج ہم سن رہے ہیں کہ جو کشمیری لوگ بھارت کام کاج یا تحصیل علم کے سلسلے میں گئے تھے، وہ حالات کی وجہ سے مجبور ہو کر گھر لوٹ رہے ہیں۔ انہیں ٹرینوں میں پکڑ کر تشدد کا نشانہ بنایا جا رہا ہے۔ بھارت میں کشمیریوں کو پکڑ کر اُن سے کہا جا رہا ہے کہ وہ پاکستان مردہ باد کے نعرے لگائیں، تب اُن کو چھوڑا جائے گا۔ کشمیریوں کا قصور فقط یہ ہے کہ ہم جنگ کی بات نہیں کرتے۔ ہم یہ کہتے ہیں کہ جموں و کشمیر کے مسئلے کا حل اگر ہوگا تو وہ بات چیت و مذاکرات کے ذریعے ہوگا۔ جنگ ہو یا پھر بندوق، اُس کی تباہی ہم نے دیکھی ہے، جنگوں سے تباہی کے علاوہ ہمیں کچھ نہیں ملا ہے۔