شیعیان حیدر کرار کے زیراہتمام جنت البقیع کے مزارات کو شہید کرنے کے خلاف ملتان میں احتجاجی ریلی

اسلام ٹائمز۔ جنت البقیع کے مزارات کو شہید کرنے کے خلاف شیعیان حیدر کرار کے زیراہتمام امام بارگاہ ابو الفضل العباس سے چوک کمہاراں والا تک احتجاجی ماتمی ریلی نکالی گئی، ریلی کی قیادت علامہ قاضی نادر علوی، علامہ مصطفی انصاری، علامہ طاہر نقوی، علامہ وسیم معصومی، جواد رضا جعفری، مولانا غلام جعفر انصاری نے کی۔ ریلی کے شرکا نے آل سعود کی جانب سے جنت البقیع میں اہل بیت اطہار اور صحابہ کرام کے مزارات کو شہید کرنے کی شدید الفاظ میں مذمت کی۔ ریلی سے خطاب کرتے ہوئے علامہ غلام مصطفی انصاری نے حکومت پاکستان سے مطالبہ کیا کہ سرکاری سطح پر فی الفور سعودی حکومت سے جنت البقیع کے مزارات کو دوبارہ تعمیر کرنے کا مطالبہ کیا جائے، جنت البقیع کے مزارات کو شہید کرنا اس صدی کا سب سے بڑا ظلم ہے جن لوگوں نے جنت البقیع میں اہل بیت اور صحابہ کرام کے مزارات کو شہید کیا انہوں نے رسول اللہ سے جنگ کی ہے، پوری دنیا میں اس پر بریت کی مثال کہیں نہیں ملتی.

ریلی کے شرکا نے سعودی حکومت کے اس اقدام کے خلاف شدید نعرے بازی کی۔ ریلی سے ذاکر اہل بیت ناصر عباس، مولانا مظہر عباس صادقی، ڈاکٹر فیاض حسین علوی نے خطاب جبکہ انجینئر سخاوت علی سیال، رانا تیمور علی، حسن عباس گھلو، حسنین علی بخاری، شہنشاہ بخاری ایڈوکیٹ، مشتاق مہدی، احسن مہدی نے شرکت کی۔ جبکہ ریلی کے اختتام ماتمی سنگت غلامان عباس ناصر بلوچ پارٹی نے نوحہ خوانی اور ماتمداری کی۔