اسلام ٹائمز۔ سابق وزیراعظم آزادکشمیر سردار عتیق احمد خان نے کہا ہے کہ سیاچن سے پاکستانی فوج کی واپسی کا یکطرفہ مطالبہ کرنے والے ملک کے غدار ہیں یہ لوگ قوم کے مخلص نہیں۔ سیاچن دنیا کا مشکل ترین جنگی محاذ ہے پاک بھارت افواج کی سیاچن سے واپسی برابری کی بنیاد پر ہونی چاہیے، گیاری سیکٹر کے شہداء نے ملک کے لیے اپنی جانوں کا نذرانہ دے کر اس پار یہ پیغام دیا ہے کہ سرحدوں کے دفاع کے لیے کسی بھی جارحیت کا جواب دینے کے لیے کمربستہ ہیں مسلم کانفرنس پاک فوج کی پشت بان ہے، ہر وقت ملک کے لیے قربانی دینے کے لیے تیار ہیں۔ انھوں نے کہا کہ شہدائے گیاری کے آبائی علاقوں میں سرکاری ادارے ان کے نام سے منسوب کئے جائیں۔ اس موقع پر خواتین ونگ کی چیئرپرسن محترمہ شمیم علی ملک، مفتی منصور، گل خندان و دیگر ان کے ہمراہ تھے۔ انھوں نے شہدائے گیاری کے لواحقین سے اظہار ہمدردی کیا۔ شہداء کے ایصال ثواب اور لواحقین کے لئے صبر جمیل کی دعا کی۔