اسلام ٹائمز۔ حکومت سندھ نے 18 جنوری کو بلدیاتی انتخابات کے پرامن ماحول میں انعقاد کیلئے ضلعی سطح پر 28 کوآرڈی نیشن کمیٹیاں تشکیل دینے کا فیصلہ کر لیا ہے۔ ان کوآرڈی نیشن کمیٹیوں کے انچارج متعلقہ ضلع کے ڈپٹی کمشنرز/ڈسٹرکٹ ریٹرننگ افسران ہوں گے۔ ان کوآرڈی نیشن کمیٹیوں میں الیکشن کمیشن، ضلعی انتظامیہ، قانون نافذ کرنے والے اداروں، بلدیاتی اداروں، محکمہ صحت سمیت دیگر اہم محکموں کے نمائندے شامل ہوں گے۔ اطلاعات کے مطابق یہ کمیٹیاں انتخابات کے موقع پر اپنے اپنے ضلع میں یونین کمیٹیوں کی سطح پر امن و امان، بلدیاتی امور سمیت دیگر اہم مسائل کے حل کیلئے مشترکہ اقدامات کریں گی اور یہ کمیٹیاں شفاف اور پرامن ماحول میں انتخابات کے انعقاد کیلئے الیکشن کمیشن کی ہدایت پر سندھ حکومت کے تعاون سے اقدامات کریں گی۔ ہر ضلع میں ڈسٹرکٹ ریٹرننگ افسر، الیکشن کمیشن اور قانون نافذ کرنے والے اداروں کی مشاورت سے 14 جنوری تک سیکورٹی پلان کو حتمی شکل دے دی جائے گی اور ہر ضلع میں ان رابطہ کار کمیٹیوں کے کنٹرول رومز ڈسٹرکٹ ریٹرننگ افسران کے دفاتر میں قائم کئے جائیں گے۔