کوئٹہ میں پاک ایران جوائنٹ بارڈر کمیشن کا اجلاس، بارڈر سکیورٹی سمیت مختلف امور پر غور

اسلام ٹائمز۔ کوئٹہ میں پاک ایران جوائنٹ بارڈر کمیشن کا اجلاس منعقد ہوا۔ جس میں مختلف امور پر غور کیا گیا۔ اجلاس میں پاکستان کی جانب سے چیف سیکرٹری بلوچستان بابر یعقوب فتح محمد، صوبائی سیکرٹری داخلہ اسد الرحمن گیلانی، آئی جی پولیس مشتاق سکھیرا اور ایران کی جانب سے ایرانی صوبے سیستان کے ڈپٹی گورنر علی اصغر میر شکاری، ایرانی وزارت داخلہ، وزارت خارجہ کے نمائندے مبشر علی میر، محمد ہادی میر آشی، حجت مفاوم محمد رضوی، حسین رشامی، کرنل عباس علی کاظمی، کرنل محمد فدائی، کرنل وحید الدین جہانیہ، کرنل محمود پارسا فور، کرنل عباس نظافتی، کرنل رضا علی احمدی، حسین رحیمی، حسین غشمی و دیگر شریک تھے۔ اجلاس میں سرحدی معاملات، سرحدی اہلکاروں کا اغواء اور ایرانی سرحدی حکام کی سرحدی خلاف ورزیوں پر غور کیا گیا۔ اجلاس سے چیف سیکرٹری بلوچستان بابر یعقوب فتح محمد نے خطاب کرتے ہوئے کہا کہ پاکستان اور ایران کے درمیان دیرینہ اور برادرانہ تعلقات ہیں۔ دونوں ممالک کے عوام تاریخی مذہبی اور ثقافتی رشتوں میں جڑے ہوئے ہیں۔ ایرانی صوبہ سیستان بلوچستان کے ڈپٹی گورنر آغا علی اصغر میر شکاری نے کہا کہ پاک ایران کے تعلقات پر گزرتے دن کیساتھ گہرے ہوتے جا رہے ہیں۔ قائداعظم محمد علی جناح نے بھی ایران کو اہمیت دی تھی۔ پاکستان کے قومی ترانے میں فارسی کے الفاظ اور علامہ اقبال کا فلسفہ خودی پاک ایران دوستی کا ثبوت ہے۔