اسلام ٹائمز۔ گلگت بلتستان کی صوبائی حکومت نے سرکاری محکموں میں کام کرنے والے ملازمین کی مستقلی کو یقینی بنانے اور اس حوالے سے قانونی تقاضے پورے کرنے کے لیے گلگت بلتستان میں گزشتہ اجلاس کے دوران پیش کیے جانے والے بل کی منظوری کو جلد از جلد یقینی بنانے کا فیصلہ کیا ہے، تاکہ پچھلے کئی سالوں سے مختلف سرکاری محکموں میں کنٹریکٹ پر کام کرنے والے ملازمین کو مستقل کیا جاسکے۔ ذرائع کے مطابق صوبائی حکومت اس بل کو آئندہ منعقد ہونے والے گلگت بلتستان قانون ساز اسمبلی کے اجلاس میں منظور کرنا چاہتی ہے، تاکہ جس طریقے سے ملک کے دیگر صوبوں میں عارٖضی ملازمین کو مستقل کیا گیا ہے اسی طرح گلگت بلتستان کے عارضی ملازمین کو بھی مستقل کیا جا سکے۔