ہیکرز کے حملے کے بعد امریکی فوج کی ویب سائٹ بند

اسلام ٹائمز۔ واشنگٹن میں امریکی فوج نے اپنی سرکاری ویب سائٹ ہیک ہونے کے بعد اسے عارضی طور پر بند کردیا ہے۔ غیرملکی خبررساں ادارے کے مطابق امریکی فوج کے شعبہ تعلقات عامہ کے سربراہ بریگیڈیئرجنرل میلکم فروسٹ نے تصدیق کی ہے کہ ان کی ویب سائٹ ’’thearmy.mil‘‘ کو ہیک کیا گیا جس کے باعث ویب سائٹ کو مزید نقصان نہ ہو سکے اور اس میں موجود معلومات کو چوری ہونے سے بچانے کے لئے اسے عارضی طور پربند کردیا گیا ہے۔ دوسری جانب امریکی فوج کی سرکاری ویب سائٹ کوہیک کرنے کی ذمہ داری شام کے صدر بشارالاسد کے حامی گروہ سیریئن الیکٹرنک آرمی نے قبول کی ہے۔ واضح رہے کہ چند روز قبل بھی ہیکرز نے امریکی حکومت کے کمپیوٹرز کو ہیک کرکے 40 لاکھ موجودہ اور سابق سرکاری ملازمین کی معلومات کے چوری کرلی تھیں، امریکا نے اس کا الزام چین پرعائد کیا تھا۔