اسلام ٹائمز۔ وزیراعظم پاکستان میاں محمد نواز شریف کا دورہ گلگت بلتستان موسم کی خرابی کے باعث منسوخ ہوگیا ہے۔ وزیراعظم پاکستان نے نئے وزیراعلٰی گلگت بلتستان کی تقریب حلف برداری میں شرکت کرنا تھی، تاہم موسم کی خرابی کے باعث ان کا دورہ گلگت بلتستان منسوخ کر دیا گیا ہے۔ واضح رہے کہ وزیراعظم نواز شریف نے چند روز قبل ہی حافظ حفیظ الرحمان کو گلگت بلتستان کا وزیراعلٰی نامزد کیا تھا۔ اس سے قبل بھی وزیراعظم نواز شریف کا دورہ گلگت بلتستان پاک آرمی کا ہیلی کاپٹر تباہ ہونے کے باعث ملتوی ہوگیا تھا۔ وزیراعظم کے ترجمان کے مطابق وزیراعظم پاکستان کی جانب سے گلگت بلتستان قانون ساز اسمبلی کے نو منتخب اسپیکر و ڈپٹی اسپیکر اور نامزد وزیراعلٰی گلگت بلتستان کو مبارکبادی دی ہے اور کہا ہے کہ گلگت بلتستان کی نئی حکومت خطے میں ترقی، پیش رفت، امن و امان کی بحالی اور تبدیلی کا پیش خیمہ ثابت ہوگی۔