ایم کیو ایم کے سابق سیکٹر انچارج کے گھر سے 2 ٹارگٹ کلرز بھاری اسلحے سمیت گرفتار

اسلام ٹائمز۔ سندھ رینجرز نے شہر قائد کے علاقے باغ کورنگی میں کارروائی کرکے دہشتگردی کا بڑا منصوبہ ناکام بنا دیا، ایم کیو ایم کے سابق سیکٹر انچارج کے گھر پر چھاپے کے دوران اسلحے کا بڑا ذخیرہ برآمد کرکے 2 ٹارگٹ کلرز کو بھی دھر لیا گیا۔ ترجمان سندھ رینجرز کے مطابق پہلے سے گرفتار دہشگرد کی نشاندہی پر سندھ رینجرز نے کراچی کے علاقے باغ کورنگی میں ایم کیو ایم کے سابق سیکٹر انچارج کے گھر پر چھاپہ مارا، کارروائی کے دوران سابق سیکٹر انچارج کے گھر میں موجود دو ٹارگٹ کلرز کو گرفتار اور بھاری تعداد میں اسلحہ برآمد کرلیا گیا۔ برآمد ہونے والے اسلحے میں ایل ایم جی، پندرہ ایس ایم جی اور ہزاروں گولیاں شامل ہیں۔ خفیہ خانوں میں چھپایا گیا اسلحہ کراچی میں دہشتگردی کی کارروائی کیلئے استعمال ہونا تھا۔