اسلام ٹائمز۔ جشن آزادی کی تقریبات کے سلسلے میں ضلعی انتظامیہ اور فیصل آباد آرٹس کونسل کے اشتراک سے تحریک پاکستان کی نایاب تصاویر کی روشنی کا سفر کے عنوان سے تین روزہ نمائش نصرت فتح علی خاں آرٹ گیلری میں شروع ہو گئی ہے۔ نمائش کا افتتاح ای ڈی او ایجوکیشن بشیر زاہد گورایہ نے کیا۔ تفصیلات کے مطابق نمائش میں قائداعظم محمد علی جناحؒ کی مختلف مصروفیات، مسلمانوں کی انڈیا سے ہجرت، مہاجر کیمپس کے مناظر سمیت جدوجہد آزادی کے مختلف مراحل پر مشتمل نادر اور نایاب تصاویر رکھی گئی ہیں۔ ای ڈی او ایجوکیشن نے اس موقع پر اظہار خیال کرتے ہوئے کہا کہ جدوجہد آزادی اور ہمارے قومی ہیروز کے کارناموں پر مشتمل یہ نایاب اور تاریخی تصاویر نئی نسل کو قیام پاکستان کے کٹھن سفر کی داستان سے آگاہ کرنے کا بہترین ذریعہ ہیں، یہ تصاویر آزادی کی کوششوں کے دوران پیش آنے والی مشکلات کی بھی یاد دلاتی ہیں۔