اسلام ٹائمز۔ افغانستان کے صوبہ قندوز مین مدرسے پر ہونے والے حملے کے خلاف مردان مین عوامی نیشنل پارٹی نے ایک احتجاجی ریلی اور بعدازاں احتجاجی مظاہرہ کیا ہے۔ پارٹی کے ضلعی دفتر تا مردان پریس کلب نکالی گئی ریلی کی قیادت ضلع ناظم حمایت اللہ مایار کر رہے تھے، جس میں پارٹی کارکنوں کے علاوہ عوام کی بھی کثیر تعداد نے شرکت کی۔ ریلی کے شرکاء نے ہاتھوں میں بینرز اور پلے کارڈز اٹھا رکھے تھے جن پر حملے کے خلاف مذمتی نعرے درج تھے۔ مظاہرین کا اس موقع پر کہنا تھا کہ دستار بندی کی تقریب پر حملہ اور اس کے نتیجے میں معصوم بچوں اور ان کے رشتہ داروں کا قتل ظلم و بربریت کی انتہا ہے۔ انہوں نے افغان حکومت سے اس واقعہ کے ذمہ داروں کے خلاف کارروائی کا مطالبہ کرتے ہوئے اقوام متحدہ پر زور دیا کہ متاثرہ گھرانوں کے ساتھ بین الاقوامی قانون کے تحت مالی امداد کی جائے۔