گستاخانہ خاکوں کے مقابلے مسلمانوں کی اجتماعی ناکامی ہیں، وزیراعظم عمران خان

اسلام ٹائمز۔ وزیراعظم عمران خان کا کہنا ہے کہ گستاخانہ خاکوں کے مقابلے مسلمانوں کی اجتماعی ناکامی ہیں، جبکہ اقوام متحدہ اور او آئی سی میں اس معاملے کو اٹھایا جائیگا۔ تفصیلات کے مطابق سینیٹ اجلاس میں ہالینڈ میں گستاخانہ خاکوں کے خلاف قرارداد مذمت منظور کرلی گئی، قائد ایوان سینیٹر شبلی فراز نے قرارداد پیش کی، جس میں کہا گیا کہ نبی اکرمﷺ سے محبت مسلمانوں کے ایمان کا حصہ ہے، مسلمان اپنے پیغمبر ﷺ کی شان میں گستاخی برداشت نہیں کریں گے، گستاخانہ خاکوں کا مقابلہ ناقابل برداشت عمل ہے، حکومت اس مسئلے کو سفارتی سطح پر اٹھائے اور ہالینڈ کی حکومت سے بھرپور احتجاج کیا جائے۔

گستاخانہ خاکوں کا معاملہ اقوام متحدہ میں اٹھائیں گے
قرارداد کی منظوری کے بعد سینیٹ اجلاس سے اظہار خیال کرتے ہوئے وزیراعظم عمران خان کا کہنا تھا کہ سینیٹ میں گستاخانہ خاکوں کے معاملے پر جو قرارداد پاس کی ہے، اس معاملے کو اقوام متحدہ میں اٹھائیں گے، مغرب میں لوگوں کو اس معاملے کی حساسیت کا اندازہ نہیں، جبکہ آزادی اظہار کے نام پر مغرب کا معاشرہ اس سے پیچھے نہیں ہٹے گا، مغربی معاشرے میں اس طرح کے کام کرنا آسان ہے۔

او آئی سی کو بہت پہلے اس پر حکمت عملی بنانی چاہیے تھی
وزیراعظم عمران خان نے کہا کہ ہم پہلے او آئی سی کو اس معاملے پر متفق کرنے کی کوشش کریں گے، ان چیزوں کا بار بار ہونا مسلم دنیا کی اجتماعی ناکامی ہے۔ انہوں نے کہا کہ او آئی سی کو بہت پہلے اس پر ایک حکمت عملی بنانی چاہیے تھی، مسلمان دنیا پہلے ایک ہو اور ایک چیز پر اکھٹی ہو، پھر اس مسئلے کو آگے اٹھایا جائے اور بتایا جائے کہ توہین رسالتﷺ پر ہمیں کتنی تکلیف ہوتی ہے۔

عوام کا پیسہ ہمارے شاہانہ خرچوں کے لیے نہیں ہے
اجلاس میں اظہار خیال کرتے ہوئے وزیراعظم عمران خان نے کہا کہ سینیٹ اجلاس میں اس لیے آیا ہوں کہ پارلیمنٹ کی اہمیت کو بڑھایا جائے، پارلیمنٹ میں ہر 2 ہفتے بعد آوٴں گا اور مختلف سوالات کے جوابات دوں گا۔ انہوں نے کہا کہ 28 ہزار ارب پاکستان پر قرضہ چڑھ چکا ہے، عوام کے ٹیکس کا پیسہ عوام پر خرچ کریں گے، عوام کا پیسہ ہمارے شاہانہ خرچوں کیلئے نہیں ہے۔

انشاء اللہ ہم جلد اپنے پاؤں پر کھڑے ہونگے
وزیراعظم نے کہا کہ عوام ٹیکس تب دے گی، جب ان کو یقین ہو کہ یہ پیسہ ان پر خرچ ہو، سادگی مہم اس لیے شروع کی کہ اپنے خرچے کم کرسکیں، خرچے کم کریں گے اور آمدنی بڑھائیں گے، انشاء اللہ ہم جلد اپنے پاؤں پر کھڑے ہوں گے۔ انہوں نے کہا کہ ہم اس ملک کے ادارے مضبوط کریں گے، جبکہ باہر کے دورے تب کریں گے، جب ملک کے اندر گورننس سسٹم ٹھیک کرلیں گے۔

قرضوں پر گزارا کرنے والی قومیں اپنی عزت کھو بیٹھتی ہیں
وزیراعظم عمران خان نے کہا کہ جب تک ہم اپنی حالت بدلنے کی کوشش نہیں کریں گے، اللہ ہماری حالت نہیں بدلے گا، قرضوں پر گزارا کرنے والی قومیں اپنی عزت کھو بیٹھتی ہیں، جبکہ اوورسیز پاکستانیوں کیلئے گورننس سسٹم ٹھیک کر رہے ہیں۔